Մարտի 18-ին ՀՀ ԱԳ նախարարի տեղակալ Մնացական Սաֆարյանն ընդունել է Հայաստանի Հանրապետությունում Լաոսի Ժողովրդական Ժողովրդավարական Հանրապետության նորանշանակ դեսպան Սիֆանդոն Օյբուաբուդդիին (նստավայրը՝ Մոսկվա)՝ հավատարմագրերի պատճենը հանձնելու կապակցությամբ։

Շնորհավորելով դեսպան Օյբուաբուդդիին պաշտոնը ստանձնելու կապակցությամբ՝ ԱԳ նախարարի տեղակալը նրան մաղթել է արդյունավետ աշխատանք առաքելությունն իրականացնելու ընթացքում: 

Զրուցակիցները քննարկել են երկկողմ օրակարգին առնչվող մի շարք հարցեր՝ պատրաստակամություն հայտնելով խորացնել համագործակցությունն առևտրատնտեսական, գիտակրթական, տեխնոլոգիական, մշակութային և այլ փոխադարձ հետաքրքրություն ներկայացնող ոլորտներում: Մտքեր են փոխանակվել նաև բազմակողմ հարթակներում համագործակցության խորացման շուրջ: 

Հանդիպման ընթացքում անդրադարձ է կատարվել տարածաշրջանային հարցերին, որի համատեքստում ԱԳ նախարարի տեղակալը ներկայացրել է Հայաստանի և Ադրբեջանի միջև հաստատված խաղաղության հետագա ինստիտուցիոնալիզացմանն ուղղված քայլերը:

Մնացական Սաֆարյանն ընդգծել է Հայաստանի կառավարության «Խաղաղության խաչմերուկ» նախագծի և վերջինիս կարևոր բաղադրիչ «TRIPP ուղու» նշանակությունը տարածաշրջանային հաղորդակցությունների ապաշրջափակման հարցում և դրանց կյանքի կոչմամբ ընձեռնվելիք տնտեսական նոր հնարավորությունները։