Նոյեմբերի 16–ին առցանց ձևաչափով տեղի են ունեցել խորհրդակցություններ Անկախ պետությունների համագործակցության (ԱՊՀ) անդամ երկրների արտաքին գործերի նախարարությունների միջև՝ «ԱՊՀ մասնակից-պետությունների ԵԱՀԿ-ում համագործակցության, ինչպես նաև ԵՄ, ՆԱՏՕ և այլ բազմակողմ եվրոպական կազմակերպությունների հետ փոխգործակցության մասին» թեմայով: Հեռավար քննարկումը նախագահում էր Ռուսաստանի Դաշնության արտաքին գործերի նախարարության համաեվրոպական համագործակցության վարչության պետ Նիկոլայ Կոբրինեցը։ Հայաստանի կողմից ելույթներով հանդես եկան ՀՀ ԱԳՆ Եվրոպայի վարչության պետ Տիգրան Սամվելյանը և Միջազգային անվտանգության վարչության պետ Գեորգի Քոչարյանը:

Գեորգի Քոչարյանը ներկայացրեց ԵԱՀԿ երեք հարթություններում, ինչպես նաև՝ Ստոկհոլմում կայանալիք նախարարական խորհրդի շրջանակներում Հայաստանի առաջնայնությունները և մոտեցումները: Ներկայացվեց նաև Հայաստան-ՆԱՏՕ համագործակցության շրջանակներում իրականացվող ծրագրերը, խաղաղապահ առաքելություններում հայ զինվորականների մասնակցությունը:

Տիգրան Սամվելյանն անդրադարձավ Հայաստանի Հանրապետության և Եվրոպական միության և ԵՄ անդամ երկրների միջև գործընկերային հարաբերություններին, ինչպես նաև՝ Եվրոպական միության հետ Հայաստանի համագործակցության երկկողմ և բազմակողմ ձևաչափերին, այն է՝ համագործակցությանը Համապարփակ և ընդլայնված գործընկերության համաձայնագրի և ԵՄ Արևելյան գործընկերության շրջանակներում։

Հանդիպման ավարտին կողմերը պայմանավորվածություն ձեռք բերեցին նիստի արդյունքում ընդունվելիք համատեղ հռչակագիրը քննարկել գրավոր ընթացակարգով: