Զոհրաբ Մնացականյանը հանդիպեց Գերմանիայի Դաշնային Հանրապետության Բունդեսթագի պատգամավորի հետ
02 մարտի, 2020
Մարտի 2-ին ԱԳ նախարար Զոհրաբ Մնացականյանը հանդիպում ունեցավ Գերմանիայի Դաշնային Հանրապետության կառավարության ՌԴ, ԱրլԳ և Արևելյան Եվրոպայի հարցերով միջհասարակական կապերի համակարգող, Բունդեսթագի պատգամավոր Դիրկ Վիզեի հետ։
Զրուցակիցները գոհունակությամբ ընդգծեցին, որ հայ-գերմանական հարաբերություններն աչքի են ընկնում երկխոսության բարձր մակարդակով, որն արտահայտվում է ոչ միայն երկու երկրների ղեկավարների միջև կանոնավոր շփումներով, արտաքին քաղաքական գերատեսչությունների և օրենսդիր մարմինների ակտիվ փոխգործակցությամբ, այլև բազմաբովանդակ համագործակցությամբ առևտրատնտեսական, գիտակրթական, մշակութային և այլ ոլորտներում։
Զոհրաբ Մնացականյանը և Դիրկ Վիզեյը մտքեր փոխանակեցին Հայաստան-Եվրամիություն գործընկերության օրակարգային հարցերի շուրջ՝ կարևորելով Համապարփակ և ընդլայնված գործընկերության համաձայնագրի դերակատարությունը ԵՄ և ԵՄ անդամ երկրների հետ երկկողմ և բազմակողմ ձևաչափով համագործակցության խթանման հարցում։ Արևելյան գործընկերության համատեքստում երկուստեք ընդգծվեց նաև քաղաքացիների շարժունակության և մարդկանց միջև շփումների բարելավմանն ուղղված քայլերի ձեռնարկումը:
Հանդիպմանն անդրադարձ կատարվեց տարածաշրջանային և միջազգային մի շարք հրատապ հարցերի։