Ս. թ. սեպտեմբերի 3-ին ԱԳ նախարար Էդվարդ Նալբանդյանը, արտգործնախարարի տեղակալներն ու Հայաստանի դիվանագիտական ներկայացուցչությունների ղեկավարները ժամանեցին Ստեփանակերտ` շարունակելու ԱԳՆ ղեկավար կազմի եւ դիվանագիտական ներկայացուցչությունների ղեկավարների ամենամյա հավաքի աշխատանքները:

Հայաստանցի բարձրաստիճան դիվանագետներին ընդունեց Լեռնային Ղարաբաղի Հանրապետության նախագահ Բակո Սահակյանը: Արցախի նախագահը ներկայացրեց երկրի սոցիալ-տնտեսական վիճակը եւ տնտեսության զարգացման հեռանկարները, արտերկրում ԼՂՀ մշտական ներկայացուցչությունների գործունեությանը: Քննարկվեցին նաեւ Հայաստանի եւ Արցախի արտգործնախարարությունների համագործակցության սերտացմանը վերաբերող հարցեր:

Լեռնային Ղարաբաղի խորհրդարանի նախագահ Աշոտ Ղուլյանի եւ պատգամավորների հետ հանդիպման ընթացքում խորհրդարանի նախագահը հանգամանալից ներկայացրեց Արցախի Ազգային ժողովի գործունեությունը, ժողովրդավարության հաստատման ճանապարհին արձանագրված ձեռքբերումները: Շուրջ երկու ժամ տեւած հանդիպմանը տեղի ունեցավ մտքերի շահագրգիռ փոխանակում արտաքին քաղականության հարցերի վերաբերյալ: