Ս.թ. մայիսի 22-ին արտգործնախարար Էդվարդ Նալբանդյանն ընդունեց երկօրյա այցով Հայաստան ժամանած Հունգարիայի Ազգային ժողովի Եվրոպական հարցերի հանձնաժողովի նախագահ Մաթիաս Յորշի գլխավորած պատվիրակությանը:

Ողջունելով հյուրերին` նախարար Նալբանդյանը  նշեց, որ Հայաստանի եւ Հունգարիայի միջեւ արդյունավետորեն զարգանում է փոխգործակցությունը երկկողմ եւ բազմակողմ ձեւաչափերով, ընդլայնվում են գործարար եւ մշակութային կապերը:

Զրուցակիցները հանգամանալից զրույց ծավալեցին Հայաստան - Եվրոպական միություն համագործակցության վերաբերյալ, քննարկեցին ԵՄ Արեւելյան գործընկերություն ծրագրին առնչվող հարցեր: Էդվարդ Նալբանդյանը նշեց, որ Եվրոպական միության հետ համագործակցության այս նոր ձեւաչափը զգալի ներուժ է պարունակում, եւ Հայաստանը մտադիր է ակտիվորեն մասնակցել ծրագրին:

Կարեւորելով երկու երկրների բազմաբովանդակ համագործակցության հետագա խորացումն ու ամրապնդումը Մաթիաս Յորշն ընդգծեց, որ այցի նպատակներից է Հայաստանի իշխանությունների հետ քննարկել ԵՄ Արեւելյան գործընկերություն ծրագիրը, նշեց նաեւ, որ երկկողմ հարաբերությունների եւ ժողովուրդների միջեւ հարաբերությունների զարգացման ենթատեքստում կարեւոր նշանակություն ունի մուտքի արտոնագրերի ստացման գործընթացի դյուրացումը:

Հանդիպմանն անդրադարձ կատարվեց արցախյան հիմնախնդրի բանակցային գործընթացի վերջին զարգացումներին, մտքեր փոխանակվեցին հայ-թուրքական հարաբերությունների կարգավորման գործընթացի վերաբերյալ: