Ս.թ. սեպտեմբերի 1-ին ՀՀ ԱԳ նախարար Էդվարդ Նալբանդյանն այցելել է Երեւանի պետական համալսարան: Մայր ԲՈւՀ-ում նա ծանոթացել է համալսարանի գործունեությանն ու կրթական ծրագրերին, ինչպես նաեւ հանդիպում ունեցել ԵՊՀ միջազգային հարաբերությունների ֆակուլտետի պրոֆեսորադասախոսական կազմի եւ ուսանողների հետ:

ՀՀ արտաքին քաղաքական գերատեսչության ղեկավարը ԵՊՀ-ում ներկայացրել է Հայաստանի արտաքին քաղաքական հիմնական ուղղությունները եւ ՀՀ դիրքորոշումները միջազգային եւ տարածաշրջանային մի շարք խնդիրների շուրջ:
Հանդիպման սկզբին նախարար Նալբանդյանն ասաց, որ ս.թ. սեպտեմբերի 3-ին Երեւանում կայանալիք արտերկրում ՀՀ դեսպանների եւ միջազգային կազմակերպություններում ՀՀ մշտական ներկայացուցիչների տարեկան հանդիպմանը մասնակցելու նպատակով Երեւանում են գտնվում ՀՀ դիվանագիտական ներկայացուցչությունների ղեկավարները: Օգտվելով առիթից` Հայաստանի արտգործնախարարության նախաձեռնությամբ ՀՀ դեսպաններն այսօր հյուրընկալվել են Երեւանի մոտ երկու տասնյակ կրթօջախներում` ԲՈւՀ-երում եւ դպրոցներում` երիտասարդ սերնդին ներկայացնելու Հայաստանի արտաքին քաղաքականությունը եւ հայ դիվանագիտության առջեւ ծառացած խնդիրները:

Էդվարդ Նալբանդյանն ասաց, որ արտգործնախարարությունը մեծ կարեւորություն է տալիս կադրերի պատրաստմանը եւ այդ առումով հարկավոր է մշտական կապ հաստատել տարբեր ԲՈւՀ-երի եւ հատկապես Երեւանի պետական համալսարանի միջազգային հարաբերությունների ֆակուլտետի հետ, որպեսզի ապագա դիվանագետները պատրաստվեն ուսանողական նստարանից: Էդվարդ Նալբանդյանը տեղեկացրեց նաեւ, որ մոտ ապագայում հիմնվելու է դիվանագիտական դպրոց, որտեղ ԲՈւՀ-ն ավարտած երիտասարդները կպատրաստվեն դիվանագետի որակավորում ստանալու համար` հետագայում ԱԳՆ-ում աշխատելու հեռանկարով:
Հանդիպման վերջին նախարար Նալբանդյանը պատասխանեց ուսանողների բազմաթիվ հարցերի:

Պատասխանելով Թուրքիայի նախագահի Հայաստան կատարելիք հնարավոր այցի ընթացքում նախագահների մակարդակով երկկողմ հարաբերություններին առնչվող հարցերի քննարկման հավանականության մասին ուսանողներից մեկի հարցին` նախարար Նալբանդյանն ասաց, որ եթե նախագահ Գյուլը ժամանի Հայաստան, ապա բնական է, որ ֆուտբոլի խաղը դիտելու ժամանակ, դրանից առաջ կամ հետո, Հայաստանի եւ Թուրքիայի նախագահները կզրուցեն, եւ բնական է, որ այդ զրույցի ժամանակ նախագահները կարող են անդրադառնալ նաեւ միջազգային, տարածաշրջանային եւ երկկողմ հարցերի: