ՀՀ ԱԳ նախարար Էդվարդ Նալբանդյանին հավատարմագրերի պատճենը հանձնեց Չեխիայի Հանրապետության դեսպան Իվան Եսթրաբը (Ivan Jestrab, նստավայրը` Թբիլիսի):

Ողջունելով հյուրին` ՀՀ ԱԳ նախարարը գոհունակություն հայտնեց հայ-չեխական հարաբերություների արդի վիճակի առնչությամբ` միաժամանակ կարեւորելով տարբեր ոլորտներում համագործակցության խորացմանն ուղղված քայլերի անհրաժեշտությունը:

Որպես երկկողմ հարաբերությունների առաջընթացի վկայություն նշվեց, ս.թ. հուլիսի սկզբին Չեխիայի ԱԳ նախարար Կարել Շվարցենբերգի Հայաստան կատարելիք պաշտոնական այցը:

Դեսպան Եսթրաբը, իր հերթին, բարձր գնահատեց Հայաստանի կողմից Եվրոպական հարեւանության քաղաքականության գործողությունների ծրագրի իրականացման ընթացքը, եւ հույս հայտնեց, որ ԵՄ-Հայաստան համագործակցությունը առավել կընդլայնվի հատկապես 2009թ., երբ ԵՄ նախագահությունը ստանձնի Չեխիայի Հանրապետությունը:

Նախարար Նալբանդյանն ու դեսպան Եսթրաբը քննարկեցին միջազգային կազմակերպություններում հայ-չեխական համագործակցության հարցերը, տնտեսական, կրթության եւ մշակույթի ոլորտներում փոխգործակցության խորացման հնարավորությունները:

Տեղեկանք. Իվան Եսթրաբը ծնվել է 1957թ. Չեխոսլովակիայում: 1976-1981թթ. սովորել է Միջազգային հարաբերությունների Մոսկվայի պետական ինստիտուտում` ստանալով մագիստրոսի աստիճան: 1990 թվականից աշխատում է ԱԳՆ համակարգում: Եղել է Չեխիայի դեսպանը Հնդկաստանում, Շրի Լանկայում, Նեպալում, Բանգլադեշում: 2002-04թթ. եղել է Չեխիայի վարչապետի արտաքին քաղաքականության հարցերով խորհրդական, 2004-06թթ.` Սերբիայում եւ Մոնտենեգրոյում Չեխիայի դեսպան, իսկ 2006թ.` Սերբիայում Չեխիայի դեսպան, 2007թվականից նշանակվել է Վրաստանում Չեխիայի դեսպան: Տիրապետում է անգլերեն, ռուսերեն, դանիերեն, նորվեգերեն, շվեդերեն, սերբերեն եւ լեհերեն լեզուներին: Ամուսնացած է, ունի երկու դուստր: