Ս.թ. ապրիլի 30-ին ՀՀ ԱԳ նախարար Էդվարդ Նալբանդյանն ընդունեց Լիտվայի նորանշանակ դեսպան Գեդրյուս Ապուոկասին (Giedrius Apuokas) հավատարմագրերի պատճենի հանձնման կապակցությամբ:
Ողջունելով դեսպանին` նախարար Նալբանդյանը հաջողություն մաղթեց նրան բարձր առաքելության կատարման գործում: Նախարարը նշեց, որ Հայաստանը հետաքրքրված է առավել ամրապնդել եւ զարգացնել համագործակցությունը երկու երկրների միջեւ եւ այս առումով Հայաստանում Լիտվայի դեսպանության բացումը կարող է լավ խթան հանդիսանալ երկկողմ հարաբերությունների զարգացման համար: Նախարար Նալբանդյանը շեշտեց, որ Լիտվայի հետ փոխգործակցությունը օգտակար կլինի նաեւ Հայաստան-ԵՄ հարաբերությունների զարգացման ենթատեքստում:

Իր հերթին դեսպան Ապուոկասին նշելով, որ Լիտվան ավանդաբար Հայաստանին վերաբերվում է առանձնահատուկ ջերմությամբ, կարեւորեց Հայաստանի հետ բազմակողմանի համագործակցության խորացումը, գերատեսչությունների միջեւ կապերի ստեղծումը: Դեսպանը տեղեկացրեց, որ մեծ ուշադրություն է դարձնելու երկու երկրների առեւտրատնտեսական եւ մշակութային կապերի զարգացմանը:

Տեղեկանք. Գեդրյուս Ապուոկասը ծնվել է 1957թ. Լիտվայի Վիլնյուս քաղաքում: 1976թ. ավարտել է Վիլնյուսի համասարանի մաթեմատիկայի ֆակուլտետը, իսկ 1980թ. Լոմոնոսովի անվան Մոսկվայի պետական համալսարանը: 1991թ. Լիտվայի մշակույթի եւ կրթության նախարարության տեղեկատվական կենտրոնում աշխատել է որպես ավագ աշխատակից, իսկ 1991-1992թթ.` Լիտվայի ԱԳՆ Արեւելյան եւ Կենտրոնական Եվրոպայի բաժնի երկրորդ քարտուղար: Այնուհետեւ մինչեւ 1995թ. աշխատել է Չեխիայի Հանրապետությունում Լիտվայի դեսպանությունում` որպես խորհրդական: 1995-1998թթ. եղել է Լիտվայի ԱԳՆ Ամերիկայի, Աֆրիկայի, Ասիայի — Օվկիանիայի վարչության Ամերիկայի բաժնի պետը, մինչեւ 2003թ.` Չիկագոյում Լիտվայի Գլխավոր հյուպատոս, իսկ 2003թ.-ից մինչ օրս `Լիտվայի ԱԳՆ տեղեկատվական տեխնոլոգիայի վարչության պետի տեղակալ,պետ: Տիրապետում է ?? անգլերեն, ռուսերեն, չեխերեն, սլովակերեն, լեհերեն եւ գերմաներեն լեզուներին: Ամուսնացած է, ունի երկու երեխա: