Օտարերկրյա օրենսդրության հիման վրա գործող զանգվածային լրատվամիջոցների ներկայացուցիչները՝ ներառյալ ԱԳՆ տարեկան հավատարմագրում անցած լրագրողները, որոնք ցանկանում են լուսաբանել 2026թ. հունիսի 7-ին կայանալիք հերթական խորհրդարանական ընտրությունները, Կենտրոնական ընտրական հանձնաժողովի կողմից հավատարմագրվելու համար մինչև մայիսի 27-ը պետք է կարճաժամկետ հավատարմագրման հայտ ուղարկեն ՀՀ արտաքին գործերի նախարարություն՝ media@mfa.am էլ. հասցեին ուղարկելով հետևյալ փաստաթղթերը.

• համառոտ ինքնակենսագրություն (հայերեն, ռուսերեն, անգլերեն կամ ֆրանսերեն լեզուներից որևէ մեկով),
• անձնագիր․ եթե անձնագրի ժամկետը երկարացված է՝ նաև վավերականությունը հաստատող էջի պատճենը (.pdf կամ .jpg ձևաչափով),
• պաշտոնական լուսանկար` հավատարմաքարտի համար (.jpg ձևաչափով),
• պաշտոնական նամակ, որը պարունակում է հետևյալ տեղեկատվությունը.

լրատվական գործունեություն իրականացնող իրավաբանական անձի համար.

• լրատվամիջոցի համառոտ նկարագիրը (լրատվամիջոցի անվանումը, տեղակայման հասցեն, լրատվամիջոցի տնօրենի կամ գլխավոր խմբագրի կոնտակտային տվյալները),
• լրագրողի (լրագրողական խմբի պարագայում՝ խմբի բոլոր անդամների) անուն, ազգանունը, 
• անցկացվող ընտրության անվանում և անցկացման օր,
• կից ներկայացվող փաստաթղթերի ցանկ,
• հայտի տրման ամսաթիվ,
• լրատվական միջոցի տնօրենի կամ գլխավոր խմբագրի ստորագրություն և ԶԼՄ կնիք:

լրատվական գործունեություն իրականացնող ֆիզիկական անձի համար.

1. ազգանուն, անուն, հայրանուն (եթե հայրանունը նշված է անձնագրում) և բնակության վայր,
2. այն լրատվամիջոցների մասին տեղեկություն, որտեղ լրագրողը նախկինում աշխատել է (առնվազն վերջին 3-ը),
3. նախկինում տպագրված հոդվածների հղումները կամ կրկնօրինակը (կից ֆայլով՝ առնվազն վերջին 5-ը),
4. այն լրատվամիջոցների կամ հարթակների մասին տեղեկություն, որտեղ պատրաստված նյութերը հրապարակվելու են,
5. բլոգերների և վլոգերների դեպքում՝ տեղեկություն լսարանի մեծության մասին և հարթակների հղումները,
6. անցկացվող ընտրության անվանում և անցկացման օր,
7. կից ներկայացվող փաստաթղթերի ցանկ,
8. հայտի տրման ամսաթիվ,
9. դիմողի ստորագրություն:

Օտարերկրյա օրենսդրության հիման վրա գործող և ՀՀ ԱԳՆ տարեկան հավատարմագրում ունեցող ԶԼՄ ներկայացուցիչների հայտի պարագայում անհրաժեշտ է, որ այն  պարունակի լրատվական միջոցի տնօրենի կամ գլխավոր խմբագրի ստորագրությունը և ԶԼՄ կնիքը, անցկացվող ընտրությունների անվանումը, օրը, ինչպես նաև դիմումի տրման ամսաթիվը: 

Նկարահանող կամ տեսագրող հատուկ սարքավորումներ (օր.՝ անօդաչու թռչող սարքեր, ԱԹՍ) օգտագործելու դեպքում հայտադիմումին կցվում է դրանց տեխնիկական նկարագրության մասին տեղեկատվությունը: Խնդրում ենք հաշվի առնել, որ նման սարքավորումների որոշ տեսակների օգտագործման համար կարող են լինել սահմանափակումներ:

ՀՀ ԱԳՆ և Հայաստանի Կենտրոնական ընտրական հանձնաժողովի կողմից հավատարմագրումը հաստատվելուն պես նախարարությունը կտրամադրի հավատարմաքարտ, որի մասին կտեղեկացվի դիմումատուն: