Հայ-ամերիկյան ռազմավարական երկխոսության շրջանակներում կայացել է աշխատանքային խմբի հանդիպում

07 դեկտեմբերի, 2022

Դեկտեմբերի 7-ին Երևանում հայ-ամերիկյան ռազմավարական երկխոսության հերթական նիստի շրջանակներում կայացել է պաշտպանական և անվտանգային հարցերով  աշխատանքային խմբի հանդիպումը:

Հանդիպմանը մասնակցել են ՀՀ անվտանգության խորհրդի, պաշտպանության, արտաքին գործերի, բարձր տեխնոլոգիական արդյունաբերության նախարարությունների, ազգային անվտանգության ծառայության, պետական եկամուտների կոմիտեի ներկայացուցիչներ, իսկ ամերիկյան կողմից՝ պաշտպանության քարտուղարության և պետքարտուղարության, ինչպես նաև Կանզաս նահանգի ազգային գվարդիայի ներկայացուցիչներ:

Բացման խոսքով հանդես է եկել ՀՀ ՊՆ նախարարի տեղակալ Արման Սարգսյանը, ով բարձր է գնահատել ՀՀ և ԱՄՆ միջև առկա համագործակցությունը և կարևորել դրա հետագա ընդլայնումը: Անդրադարձ կատարելով ներկայիս անվտանգային իրավիճակին՝ նախարարի տեղակալն ընդգծել է, որ ադրբեջանական զինված ուժերի կողմից ՀՀ ինքնիշխան տարածքի օկուպացիան լրջորեն խաթարում է Հարավային Կովկասում առկա փխրուն կայունությունը։

Հանդիպման ընթացքում անդրադարձ է կատարվել ոլորտային հարցերի շուրջ փոխգործակցության հնարավորություններին և համատեղ ծրագրերի իրականացմանը, կողմերը նախանշել են առաջնահերթությունները և  պատրաստակամություն հայտնել քայլեր ձեռնարկել դրանց իրականացման ուղղությամբ:  

Տպել էջը