ԱԳ նախարարի տեղակալի և ԵՄ պաշտոնյաների համատեղ մամուլի ասուլիսի վերաբերյալ
26 նոյեմբերի, 2019
Նոյեմբերի 26-ին, ՀՀ կառավարության և Հայաստանում ԵՄ պատվիրակության նախաձեռնությամբ, ՀՀ-ԵՄ Համապարփակ և ընդլայնված գործընկերության համաձայնագրի (ՀԸԳՀ) շուրջ հանրային իրազեկման բարձրացման միջոցառումների շրջանակներում տեղի ունեցավ համատեղ մամուլի ասուլիս՝ ԱԳ նախարարի տեղակալ Ավետ Ադոնցի, Եվրոպական հանձնաժողովի Հարևանության և ընդլայնման բանակցությունների գլխավոր տնօրինության արևելյան հարևանության հարցերով տնօրեն Լոուրենս Մերեդիթի և Արտաքին գործողության եվրոպական ծառայության Եվրոպայի և Կենտրոնական Ասիայի հարցերով կառավարող տնօրենի տեղակալ Լյուկ Դևինի մասնակցությամբ։
Բացման խոսքում Ավետ Ադոնցը ներկայացրեց ՀԸԳՀ-ի կարևորությունը, դրա վավերացման և ամբողջական կիրարկմանն ուղղված ընթացիկ գործընթացները։ ԱԳ նախարարի տեղակալն անդրադարձ կատարեց նաև ՀՀ-ԵՄ մուտքի արտոնագրերի ազատականացման շուրջ երկխոսության մեկնարկի կարևորությանը, ինչպես նաև՝ Արևելյան գործընկերության ապագայի շուրջ ՀՀ տեսլականին։
Մամուլի ասուլիսին հաջորդեց հաշմանդամություն ունեցող անձանց մասնակցությամբ կազմակերպված «Ուժեղ ենք միասին» խորագիրը կրող նորաձևության ցուցադրությունը։