ԳԴՀ-ում ՀՀ դեսպան Աշոտ Սմբատյանի հանդիպումը ԳԴՀ ներքին գործերի նախարարության պետքարտուղարի հետ
16 օգոստոսի, 2018
Օգոստոսի 16-ին ԳԴՀ-ում ՀՀ դեսպան Աշոտ Սմբատյանը հանդիպեց ԳԴՀ ներքին գործերի նախարարության դաշնային պետքարտուղար Հելմուտ Թայխմանի հետ:
Հանդիպմանը քննարկվեցին հայ-գերմանական հարաբերությունների օրակարգի մի շարք հարցեր:
Զրուցակիցներն անդրադարձան Համապարփակ և ընդլայնված գործընկերության համաձայնագրին՝ կարևորելով այն ինչպես Եվրոպական միության, այնպես էլ ԵՄ անդամ պետությունների հետ Հայաստանի գործընկերության զարգացման տեսանկյունից:
Այս համատեքստում զրուցակիցները մտքեր փոխանակեցին ՀՀ-ԵՄ մուտքի արտոնագրային ռեժիմի ազատականացման շուրջ երկխոսության մեկնարկի վերաբերյալ: ՀՀ դեսպանը նշեց, որ հայկական կողմն ակնկալում է ԵՄ անդամ պետությունների և մասնավորապես գերմանական կողմի աջակցությունն այս ուղղությամբ առաջընթաց արձանագրելու հարցում՝ ընդգծելով այս գործընթացի կարևորությունը երկու հասարակությունների միջև կապերն ավելի ամրապնդելու համար:
Մտքեր փոխանակվեցին նաև փախստականների հարցերի և ապօրինի միգրացիոն հոսքերին առնչվող խնդիրների շուրջ: