Հայաստան այցելեց ԵԱՀԿ գործող նախագահի հատուկ ներկայացուցիչ Պաոլա Սևերինոն
19 հուլիսի, 2018
Հուլիսի 19-ին ԱԳ նախարարի տեղակալ Աշոտ Հովակիմյանն ընդունեց կոռուպցիայի դեմ պայքարի հարցերով ԵԱՀԿ գործող նախագահի հատուկ ներկայացուցիչ Պաոլա Սևերինոյի ղեկավարած պատվիրակությանը:
Նախարարի տեղակալը ողջունեց ԵԱՀԿ իտալական նախագահության ներկայացուցչի առաջին այցը Հայաստան՝ բարձր գնահատելով Հայաստանի և ԵԱՀԿ նախագահության միջև համագործակցությունը ԵԱՀԿ օրակարգի հարցերի շուրջ:
Փոխնախարարը կարևորեց պրոֆեսոր Սևերինոյի Հայաստան այցի նախաձեռնությունը, ինչը վկայում է Իտալիայի կողմից կոռուպցիայի դեմ պայքարի ոլորտում Հայաստանի ձեռքբերումները գնահատելու մասին, ինչպես նաև ցույց է տալիս, որ իտալական կողմը պատրաստ է աջակցություն ցուցաբերել Հայաստանին այդ ուղղությամբ իրականացվող հետագա քայլերում:
Հովակիմյանը նշեց, որ կոռուպցիայի դեմ պայքարը Հայաստանի նոր կառավարության առաջնահերթություններից է: Նա ներկայացրեց այդ ուղղությամբ արձանագրված հաջողությունները և կոռուպցիայի դեմ պայքարի ոլորտում ՄԱԿ-ի և ԵԱՀԿ շրջանակներում Հայաստանի միջազգային համագործակցության ընթացքը:
Կողմերը երկուստեք կարևորեցին կրթության դերը կոռուպցիայի նկատմամբ անհանդուրժողականության մշակույթի ձևավորման գործում:
Նախարարի տեղակալն ընդգծեց, որ կոռուպցիան հանդիսանում է սպառնալիք թե՛ պետությունների և թե՛ միջազգային անվտանգության համար: Այդ համատեքստում նա մտահոգիչ համարեց որոշ միջազգային կազմակերպություններում արձանագրված կոռուպցիայի դեպքերը: