Հունվարի 26-ին Վրաստանում ՀՀ դեսպանությունը ՀՀ Զինված ուժերի կազմավորման 26-ամյակի առթիվ Թբիլիսիում կազմակերպել էր պաշտոնական ընդունելություն, որին ներկա էին Վրաստանի պաշտպանության նախարար Լևան Իզորիան, նախարարի առաջին տեղակալ Լելա Չիքովանին, ԶՈՒ Գլխավոր շտաբի պետ, գեներալ-մայոր Վլադիմեր Չաչիբայան, պաշտապանության նախկին նախարար, գեներալ-լեյտենանտ Դավիթ Թևզաձեն, ՊՆ և ԶՈՒ Գլխավոր շտաբի վարչությունների և ծառայությունների պետեր, Վրաստանի ԱԳՆ պաշտոնյաներ, Վրաստանում հավատարմագրված դիվանագիտական և ռազմադիվանագիտական կորպուսի ներկայացուցիչներ, ռազմական փորձագետներ, Վրաստանի խորհրդարանի հայազգի պատգամավորներ, հոգևոր դասի և վիրահայ համայնքային կառույցների մի շարք ներկայացուցիչներ։

Ողջույնի իր խոսքում Վրաստանում ՀՀ ռազմական կցորդ, գնդապետ Սամվել Ռամազյանը ներկայացրեց օրվա խորհուրդն ու Հայոց զինուժի դերն ու նշանակությունը հայ ժողովրդի ողջ պատմության ընթացքում, ինչպես նաև անդրադարձ կատարեց Հայոց բանակի կազմավորման գործընթացին ու դրա անցած ուղուն։ Խոսելով հայ-վրացական դարավոր զինակցության մասին՝ բանախոսը, մասնավորապես, անդրադարձավ պատմական այն դրվագներին, որտեղ հայերն ու վրացիները համատեղ ուժերով պայքարել են օտար զավթիչների դեմ՝ հանուն իրենց ազատության։

Վրաստանի պաշտպանության նախարար Լևան Իզորիան իր ելույթում ընդգծեց հայ և վրացի ժողովուրդների միջև պատմականորեն ձևավորված փոխգործակցության կարևորությունը՝ շեշտելով ռազմական համագործակցության զարգացման անհրաժեշտությունը՝ ի շահ երկու երկրների և տարածաշրջանային անվտանգության։ Նախարարը, անդրադառնալով հայ-վրացական բարեկամությանը, մատնանշեց, որ Հայաստանը մշտապես դիտարկվում է որպես բարեկամ երկիր։

Վրաստանում ՀՀ դեսպան Ռուբեն Սադոյանն իր շնորհավորական խոսքում նշեց այն կարևոր դերակատարությունը, որն իրականացնում են ՀՀ Զինված ուժերը երկրի անվտանգության պահպանման ուղղությամբ։

Վրաստանում ռազմադիվանագիտական կորպուսի դուայեն, Չեխիայի ռազմականկցորդ Շտեֆան Գրիվալսկին հաջողություն մաղթեց ՀՀ Զինված ուժերին իրենց ամենօրյա գործունեության մեջ՝ համոզմունք հայտնելով, որ հայ զինվորականության մերօրյա սերունդը մշտապես հավատարիմ կլինի նախնիներից ժառանգած պատմական հարուստ ավանդույթներին։

Ելույթներին հաջորդեց պաշտոնական հյուրասիրություն՝ հայկական և վրացական երգ ու պարի ուղեկցությամբ:

Հունվարի 28-ին ՀՀ Զինված ուժերի կազմավորման 26-ամյակի կապակցությամբ Վրաստանում ՀՀ դեսպանության անձնակազմը դեսպան Ռուբեն Սադոյանի գլխավորությամբ Վիրահայոց թեմի հոգևոր դասի և թբիլիսահայ համայնքի ներկայացուցիչների մասնակցությամբ հարգանքի տուրք մատուցեց Սուրբ Գևորգ առաջնորդանիստ եկեղեցու բակում ամփոփված փառապանծ հայազգի զորավարներ՝ գեներալներ Միխայիլ Լորիս-Մելիքովի, Իվան Լազարևի, Բորիս Շելկովնիկովի, Արզաս Տեր-Ղուկասովի հիշատակին, տեղի ունեցավ զինվորական պատիվներով ծաղկեպսակի զետեղման արարողություն, կատարվեց հոգեհանգստյան կարգ:

Իր խոսքում դեսպան Սադոյանն անդրադարձավ այն կարևորագույն դերին ու նշանակությանը, որ ունեն ՀՀ Զինված ուժերը։

Վրաստանում ՀՀ դեսպանության ռազմական կցորդ, գնդապետ Սամվել Ռամազյանը իր հերթին խոսեց Հայոց բանակի կազմավորման, զարգացման ու բանակաշինության հիմքերի մասին, անդրադարձավ ռազմական ոլորտում հայ ժողովրդի հարուստ ավանդույթներին։

Արարողությանը նախորդել էր Սուրբ Գևորգ եկեղեցում տեղի ունեցած կիրակնօրյա պատարագը, որտեղ ներկաները մոմեր վառեցին և աղոթք բարձրացրեցին Հայոց բանակի և հայ զինվորների համար։