Հայաստանի և Հայիթիի արտգործնախարարների հանդիպումը
10 հոկտեմբերի, 2015
Հոկտեմբերի 10-ին արտաքին գործերի նախարար Էդվարդ Նալբանդյանը հանդիպեց Հայիթիի արտաքին գործերի և պաշտամունքի նախարար Լեներ Ռենոյին:
Ողջունելով հյուրին՝ Հայաստանի արտաքին գերատեսչության ղեկավարը շնորհակալություն հայտնեց Ֆրանկոֆոնիայի նախարարական համաժողովին մասնակցելու համար և արձանագրեց Ֆրանկոֆոնիայի միավորող դերը տարբեր երկրների ժողովուրդների և մշակույթների միջև: Նախարարը խորհրդանշական համարեց այս օրերին՝ նախարարական համաժողովի կապակցությամբ Հայիթիի մշակույթը ներկայացնող խմբի հյուրախաղերը Երևանում։
Շնորհակալություն հայտնելով ՖՄԿ նախարարական համաժողովի բարձր մակարդակով կազմակերպման և ջերմ ընդունելության համար` Լեներ Ռենոն նշեց, որ ուրախ է Հայաստանում գտնվել և քննարկել երկկողմ փոխգործակցության հաստատման ուղիները։
Հանդիպման ընթացքում կողմերը քննարկեցին երկու երկրների միջև իրավապայմանագրային դաշտի ձևավորման, միջազգային կազմակերպությունների շրջանակներում համագործակցության հաստատման հնարավորությունները:
Հայիթիի արտաքին գործերի և պաշտամունքի նախարարն իր երախտապարտությունն արտահայտեց Հայաստանին և հայ փրկարարներին, որոնք իրենց պատրաստակամությունն էին հայտնել 2010թ. ձմռանը Հայիթիում տեղի ունեցած ավերիչ և ողբերգական երկրաշարժից տուժած քաղաքացիներին օգնության ձեռք մեկնելու համար: