Դեսպան Տեր-Ստեփանյանի հանդիպումը Ֆրանկոֆոնիայի միջազգային կազմակերպության գլխավոր քարտուղարի հետ
03 ապրիլի, 2014Ապրիլի 3-ին Ֆրանկոֆոնիայի մշտական խորհրդում ՀՀ ներկայացուցիչ, դեսպան Քրիստիան Տեր-Ստեփանյանը հանդիպում ունեցավ Ֆրանկոֆոնիայի միջազգային կազմակերպության գլխավոր քարտուղար Աբդու Դիուֆի հետ։
Աբդու Դիուֆը շնորհավորեց դեսպան Տեր–Ստեփանյանին Ֆրանսիայում ֆրանկոֆոն դեսպանների նորաստեղծ խմբի նախագահի պաշտոնում նշանակման կապակցությամբ և իր աջակցությունը հայտնեց խմբի գործունեությանը։
Գլխավոր քարտուղարը ողջունեց Հայաստանի ներդրումը Ֆրանկոֆոնիայի և նրա արժեքների տարածման գործում՝ գոհունակություն հայտնելով Հայաստանի և ՖՄԿ-ի միջև սերտ համագործակցության կապակցությամբ։
Հանդիպման ընթացքում Ֆրանկոֆոնիայի մշտական խորհրդում ՀՀ ներկայացուցիչը ՖՄԿ գլխավոր քարտուղարի ուշադրությունը հրավիրեց Սիրիայի հայաբնակ Քեսաբ քաղաքի վրա Թուրքիայի տարածքից սահմանը հատած, ալ- Քաիդայի հետ կապված ահաբեկչական խմբերի կողմից իրականացված հարձակումների հետևանքով տեղահանված տեղի բնակչության մարդասիրական ծանր իրավիճակի վրա։
Նա հայտնեց Հայաստանի իշխանությունների խորը մտահոգությունը իրականացված բռնությունների և մարդու իրավունքների ու ազգային փոքրամասնության իրավունքների կոպիտ ոտնահարման կապակցությամբ։