Նոյեմբերի 14-ին համատեղության կարգով Անդորրայի Իշխանությունում ՀՀ դեսպան Վիգեն Չիտեչյանն իր հավատարմագրերը հանձնեց Նորին Գերազանցություն Անդորրայի Իշխանության Համիշխան, Իսպանիայի Ուխելի Եպիսկոպոս Գերաշնորհ Խուան Էնրիկ Վիվես Սիսիլիային (Son Excellence Monseigneur Joan Enric Vives Sicilia, Coprince de la Principauté d'Andorre):

Հավատարմագրերի հանձնման պաշտոնական արարողությանը հաջորդած առանձնազրույցի ընթացքում Անդորրայի Համիշխանը շնորհավորեց դեսպանին հավատարմագրման կապակցությամբ եւ համոզմունք հայտնեց, որ Անդորրայի եւ Հայաստանի միջեւ արդեն իսկ ձեւավորված բարեկամական հարաբերություններն առաջիկա տարիներին կշարունակեն զարգանալ եւ էլ ավելի խորանալ:

ՀՀ դեսպանը կարեւորեց Անդորրայի Իշխանության հետ Հայաստանի երկկողմ հարաբերությունների զարգացումը, ինչպես նաեւ համագործակցությունն այնպիսի միջազգային կազմակերպությունների շրջանակներում, ինչպիսիք են ՄԱԿ-ը, ՅՈՒՆԷՍԿՕ-ն, Եվրոպայի Խորհուրդը, Ֆրանկոֆոնիայի Միջազգային կազմակերպությունը:

Նույն օրը դեսպան Չիտեչյանը հանդիպեց Անդորրայի Արտաքին գործերի նախարար Ժիլբեր Սաբոյա Սունիեի (Gilbert Saboya Sunyé) հետ: Հանդիպմանը քննարկվեցին ինչպես հայ-անդորրական հարաբերություններին առնչվող, այնպես էլ ընդհանուր հետաքրքրություն ներկայացնող միջազգային եւ տարածաշրջանային հարցեր: