Ապրիլի 24-ին ԱՄՆ-ում ՀՀ դեսպանության տարածքում տեղադրված խաչքարի մոտ տեղի ունեցավ ոգեկոչման եւ ծաղկեպսակների զետեղման արարողություն` նվիրված Հայոց ցեղասպանության 1.5 միլիոն զոհերի հիշատակին:

Վաշինգտոնի եւ շրջակա նահանգների հայ համայնքի բոլոր թեւերը ներկայացնող հարյուրավոր անդամների մասնակցությամբ Վաշինգտոնի Սուրբ Մարիամ Աստվածածին եւ Սուրբ Խաչ եկեղեցիների հոգեւոր հայրերը մատուցեցին պատարագ` նվիրված Հայոց Մեծ Եղեռնի զոհերի հիշատակին:

Ելույթով հանդես եկավ դեսպան Թաթուլ Մարգարյանը, որն իր խոսքում մասնավորաբար նշեց, որ տարին նշանավորվեց ցեղասպանության ճանաչման գործում նոր նվաճումներով իրավական դաշտում. Կալիֆոռնիայի եւ Մասաչուսեթսի նահանգային դատարանների որոշումները լուրջ հարված էին թուրքական ժխտողականությունը: Դեսպանն ընդգծեց, որ ցեղասպանության ժխտողականությունը ցեղասպանության հանցագործության շարունակությունն է, եւ այն դատապարտված է:

Դեսպան Մարգարյանը շնորհավորեց ներկաներին Սուրբ Զատիկի եւ Հարության տոնի կապակցությամբ` ընդգծելով անսասան եւ անկոտրում հավատքի դերը անցյալի արհավիրքների հաղթահարման եւ պատմական արդարության վերականգնման համար մղվող պայքարի գործում: