Հոկտեմբերի 28-ին ՀՀ ԱԳ նախարարի տեղակալ Կարինե Ղազինյանն ընդունեց Հայաստանում Հունգարիայի դեսպան Գաբոր Շագիին (նստավայրը` Թբիլիսի):

Հանդիպման ընթացքում կողմերը բարձր գնահատեցին երկկողմ հարաբերություններում առկա մակարդակը` շեշտելով գոյություն ունեցող ներուժը խթանելու անհրաժեշտությունը:

Դեսպան Շագին տեղեկացրեց, որ մինչեւ ընթացիկ տարվա ավարտը նախատեսվում է Հունգարիայի վարչապետի տարածաշրջանային աշխատանքային այցը Հայաստան, ինչը հնարավորություն կընձեռի նոր լիցք հաղորդելու երկու երկրների միջեւ քաղաքական եւ տնտեսական համագործակցությանը, ինչպես նաեւ` նախքան ԵՄ-ում Հունգարիայի նախագահության սկիզբը՝ անդրադառնալ նախագահության ընթացքում Հունգարիայի առաջնահերթություններին:

2011 թ. հունվարից Հունգարիայի ԵՄ նախագահությունը ստանձնելու առնչությամբ փոխնախարար Ղազինյանը ներկայացրեց ՀՀ-ԵՄ ասոցացման համաձայնագրի շուրջ բանակցային գործընթացը եւ ՀՀ մոտեցումները, շեշտեց Հայաստան-ԵՄ համագործակցությունն ավելի ընդլայնելու ՀՀ իշխանությունների պատրաստակամությունը: Նկատի ունենալով, որ հունգարական նախագահության ընթացքում 2011 թ. մայիսին Բուդապեշտում նախատեսվում է Արեւելյան գործընկերության գագաթաժողովը, տիկին Ղազինյանը կարեւորեց նաեւ դրա օրակարգում գործընկեր երկրների համար կարեւորություն ներկայացնող հարցերի ընդգրկումը, մասնավորապես` ԵՄ երկրների հետ մուտքի արտոնագրերի ստացման գործընթացի դյուրացման հարցը:

Հանդիպման ընթացքում զրուցակիցները մտքեր փոխանակեցին նաեւ տարածաշրջանային խնդիրների շուրջ: