Հուլիսի 14-ին բացվել է Դամասկոսի 57-րդ միջազգային արդյունաբերական ցուցահանդեսը, որին մասնակցում է նաև Հայաստանը:

Հայկական տաղավարում ներկայացված էին հայաստանյան 20-ից ավելի, այդ թվում` «Ջերմուկ Գրուպ», «Դիլիջան», «Արզնի», «Ռոյալ Արմենիա», «Սիգարոն» ընկերությունների գործունեությունը լուսաբանող տեղեկատվական և գովազդային նյութեր:

Բացման պաշտոնական արարողությունից հետո հայկական տաղավար այցելեցին Սիրիայի Արաբական Հանրապետության վարչապետ Մուհամմադ Նաջի Օտրին, կառավարության անդամներ, դիվանագետներ, լրագրողներ:

Հայաստանի դեսպան Արշակ Փոլադյանի հետ կարճատև զրույցի ընթացքում Սիրիայի վարչապետը գոհունակություն հայտնեց երկարամյա ընդմիջումից հետո ցուցահանդեսին Հայաստանի մասնակցության կապակցությամբ` ընդգծելով, որ Հայաստանի մասնակցությունը նման լուրջ միջազգային միջոցառումների նոր խթան կհանդիսանա հայ-սիրիական առևտրատնտեսական հարաբերությունների զարգացման համար: Զրուցակիցները երկուստեք ընդգծեցին հայ-սիրիական տնտեսական համագործակցության ակտիվացման անհրաժեշտությունը:

Հայկական տաղավարի այցելուները մեծ հետաքրքրություն էին ցուցաբերում հայկական արտադրության ապրանքների, մասնավորապես` հանքային ջրերի նկատմամբ:

Ցուցահանդեսին մասնակցում են ավելի քան 50 երկիր Եվրոպայից, Մերձավոր Արևելքից, Ասիայից և Հարավային Ամերիկայից: