Հուլիսի 12-ին արտգործնախարարությունում "Ոսկե ծիրան" միջազգային կինոփառատոնի մասնակիցների պատվին տեղի ունեցավ ընդունելություն, որին ներկա էին կինոփառատոնին մասնակցելու նպատակով ժամանած բազմաթիվ հյուրեր, "Ոսկե ծիրանի" կազմակերպիչներ, Երեւանում հավատարմագրված դեսպաններ եւ միջազգային կազմակերպությունների ներկայացուցիչներ:
Հյուրերի թվում էին համաշխարհային կինոարվեստի հռչակավոր ներկայացուցիչներ Ալեն Թերզյանը, Ատոմ Էգոյանը եւ Կլաուդիա Կարդինալեն:

Ընդունելությանը ողջույնի խոսքով հանդես եկավ արտգործնախարար Էդվարդ Նալբանդյանը, որը մասնավորապես նշեց. "Ոսկե ծիրան" միջազգային փառատոնը տարեցտարի ընդլայնում է իր ավանդույթներն ու աշխարհագրությունը Երեւանում հավաքելով աշխարհի ավելի ու ավելի մեծ թվով երկրներից ժամանած արվեստագետների, որոնք թեեւ խոսում են տարբեր լեզուներով, բայց հաղորդակցվում են նույն լեզվով? կինոյի լեզվով, որն իր մեջ պարունակում է հզոր համախմբող եւ մերձեցնող ուժ:

"Մարդկությունը իր ողջ պատմության ընթացքում երազել է կանգնեցնել ժամանակը, ինչ որ չափով դա հաջողվել է լուսանկարչական արվեստին: Բայց եթե լուսանկարչությունը կանգնեցնում է ակնթարթը մեկ վայրկյանով, ապա կինոն մեկ վայրկյանում քսանչորս ակնթարթ է կանգենցնում: Երեւի թե, հենց դրանում է կայանում կինեմատոգրաֆիայի հմայիչ ուժն ու խորհուրդը",- ասած Հայաստանի արտգործնախարարը:

"Երբ գալիս է ,"Ոսկե ծիրանը" փառատոնը մեծ խանդավառությամբ է ընդունվում Հայաստանում եւ իսկապես տոն է մեր բոլորի համար: Մաղթում եմ, որ յոթերորդ արվեստի յոթերորդ Երեւանյան փառատոնը մնա ձեր հիշողության մեջ? որպես տոն, որը միշտ մեզ հետ է",- եզրափակեց Էդվարդ Նալբանդյանը: