Այսօր Հայաստանի արտաքին գործերի նախարարի տեղակալ Արման Կիրակոսյանն ընդունեց քառօրյա այցով Հայաստանում գտնվող Միացյալ ՆահանգներիԱզգային ռազմական քոլեջի(National War College) պատվիրակությանը, որի կազմում էին բարձրաստիճան զինվորականներ եւ դիվանագետներ:

Ողջունելով պատվիրակության այցը Հայաստան` Արման Կիրակոսյանն ընդգծեց, որ նմանօրինակ հանդիպումներն արդյունավետ են երկուստեք: Նախարարի տեղակալը հյուրերին ներկայացրեց Հայաստանի արտաքին քաղաքականության գերակայություններն ու մարտահրավերները` նշելով, որ հայ-ամերիկյան հարաբերությունները հանդիսանում են առաջնային ուղղություններից մեկը: Արծարծվեց նաեւ հայ-ամերիկյան համագործակցությունը ռազմաքաղաքական բնագավառում:

Զրուցակիցները մտքեր փոխանակեցին տարածաշրջանային խնդիրների վերաբերյալ, անդրադարձան արցախյան հիմնախնդրի բանակցային գործընթացի, հայ-թուրքական հարաբերությունների ներկա փուլին: