Տարածաշրջանային այցելությամբ Միջին Արեւելքում գտնվող ՀՀ արտգործնախարար Էդվարդ Նալբանդյանը ս.թ. փետրվարի 25-ին պաշտոնական այցով ժամանեց Բեյրութ:

Օդանավակայանից նախարար Նալբանդյանը մեկնեց նախագահի նստավայր, ուր նրան ընդունեց Լիբանանի նախագահ Միշել Սլեյմանը:

Ողջունելով Հայաստանի ԱԳՆ ղեկավարին` Լիբանանի նախագահն ասաց, որ Լիբանանի ժողովուրդը առանձնահատուկ համակրանք ունի հայ ժողովրդի հանդեպ: Բարձր գնահատելով երկու երկրների միջեւ առկա բարեկամական սերտ հարաբերությունները, նախագահ Սլեյմանը նշեց, որ դրանում իր զգալի ներդրումն ունի Լիբանանի հայ համայնքը:

Միշել Սլեյմանը խնդրեց իր բարեմաղթանքներն ու ողջույնները փոխանցել ՀՀ նախագահ Սերժ Սարգսյանին:
Էդվարդ Նալբանդյանը Միշել Սլեյմանին հանձնեց Հայաստանի նախագահ Սերժ Սարգսյանի ուղերձը եւ Հայաստան այցելելու հրավերը: Նա նշեց, որ Հայաստանում բարձր են գնահատում Լիբանանի հետ ջերմ եւ փոխշահավետ հարաբերությունները, ընդգծելով, որ Լիբանանը արաբական աշխարհի այն պետությունն է, որի հետ Հայաստանն ունի Բարեկամության պայմանագիր:

Հանդիպմանը նախագահ Սլեյմանն ու նախարար Նալբանդյանը մտքեր փոխանակեցին երկկողմ հարաբերությունների զարգացման հեռանկարների շուրջ, քննարկեցին միջինարեւելյան տարածաշրջանում եւ Հարավային Կովկասում վերջին զարգացումներն ու առկա հիմնախնդիրների կարգավորման հնարավորությունները, ինչպես նաեւ Լիբանանում կայունության եւ անվտանգության ամրապնդման ուղղությամբ ձեռնարկվող քայլերը:

Բեյրութում Էդվարդ Նալբանդյանը հանդիպեց նաեւ Լիբանանի խորհրդարանի նախագահ Նաբիհ Բըրրիի հետ:
Լիբանանի խորհրդարանի նախագահը բարձր գնահատեց տարբեր ոլորտներում երկու երկրների համագործակցությունը եւ ասաց, որ խորհրդարանը հավելյալ ջանքեր կգործադրի հարաբերությունների հետագա խորացման նպատակով:

Զրուցակիցները քննարկեցին միջխորհրդարանական կապերի ակտիվացման ուղիները: Երկուստեք կարեւորվեց խորհրդարանականների փոխայցելությունների եւ միջխորհրդարանական բարեկամական խմբերի աշխատանքների ակտիվացումը:

Էդվարդ Նալբանդյանը հանդիպում ունեցավ նաեւ Լիբանանի վարչապետ Ֆուադ Սինյորայի հետ:

Լիբանանի վարչապետը, բարձր գնահատելով երկու երկրների միջեւ ձեւավորված բարեկամական կապերը, ասաց, որ լիբանանահայ համայնքը յուրահատուկ կամուրջի դեր է կատարում Հայաստանի եւ Լիբանանի փոխշահավետ համագործակցության զարգացման գործընթացում:

Հանդիպման ընթացքում քննարկվեցին երկու երկրների միջեւ առեւտրատնտեսական հարաբերությունների առավել զարգացման ուղղությամբ ձեռնարկվելիք քայլերը:

Զրուցակիցները գոհունակություն հայտնեցին երկու երկրների միջեւ գոյություն ունեցող ծավալուն իրավապայմանագրային դաշտի կապացությամբ եւ նշեցին, որ այն լայն հնարավորություններ է ընձեռում փոխգործակցության հետագա զարգացման համար եւ կարեւորեցին հայ-լիբանանյան միջկառավարական հանձնաժողովի աշխատանքների վերսկսումը, որը վերջին նիստը կայացել է 2004 թ.:

Էդվարդ Նալբանդյանը, նշելով, որ Հայաստանում արդեն գործում են լիբանանյան ներդրումներով մոտ 50 ձեռնարկություն, ընդգծեց նոր տնտեսական նախագծերով գոյություն ունեցող կապերի ընդլայման անհրաժեշտությունը:

Վարչապետ Սինյորան եւ նախարար Նալբանդյանը մտքեր փոխանակեցին համաշխարհային ֆինանսատնտեսական ճգնաժամի հետեւանքները մեղմելու վերաբերյալ:

Փետրվարի 25-ին տեղի ունեցավ նաեւ Էդվարդ Նալբանդյանի եւ Լիբանանի արտգործնախար Ֆաուզի Սալլուխի առանձնազրույցը, որին հաջորդեցին բանակցությունները պատվիրակությունների մասնակցությամբ:

Ողջունելով ՀՀ արտաքին քաղաքական գերատեսչության ղեկավարին` Լիբանանի արտգործնախարարն ասաց, որ երկու պետությունների միջեւ ձեւավորվել են օրինակելի հարաբերություններ, ինչը պայմանավորված է փոխադարձ համակրանքով եւ բարեկամական փոխգործակցության զարգացման փոխադարձ ցանկությամբ:

Էդվարդ Նալբանդյանը նշեց, որ անկախությունից ի վեր Հայաստանը քայլեր է ձեռնարկել Լիբանանի հետ հարաբերությունների համակողմանի զարգացման ուղղությամբ, եւ այդ ոլորտում լուրջ ձեռքբերումներ կան` բարձր մակարդակի այցելություններ, առեւտրատնտեսական համագործակցություն, մշակութային փոխանակումներ: ՀՀ արտգործնախարարի բնորոշմամբ` վերջին տարիներին, օբյեկտիվ եւ սուբյեկտիվ պատճառներով, հայ-լիբանանյան հարաբերությունների զարգացումը դանդաղել է, եւ իր այցի նպատակն է նոր լիցք հաղորդել փոխշահավետ համագործակցությանը:

Զրուցակիցները պայմանավորվեցին նաեւ իրենց կողմից ղեկավարվող գերատեսչությունների միջեւ պարբերական խորհրդատվությունների վերսկսման մասին:

Նախարարներն անդրադարձան տարածաշրջանային խնդիրների կարգավորման գործընթացին` կարեւորելով ուժի կիրառման բացառումը` որպես հիմնախնդիրների արդյունավետ լուծման կարեւոր գրավական:

Արտաքին քաղաքական գերատեսչությունների ղեկավարների հանդիպմանը հետեւեց համատեղ մամուլի ասուլիս:

Էդվարդ Նալբանդյանը եւ Ֆաուզի Սալլուխը քննարկումները շարունակեցին ՀՀ արտգործնախարարի պատվին կազմակերպված պաշտոնական ճաշի ընթացքում:

Լիբանան պաշտոնական այցի շրջանակներում Հայաստանի արտգործնախարարն այցելեց Մեծի Տանն Կիլիկիո կաթողիկոս Ն.Ս.Օ.Տ.Տ. Արամ Ա-ին: Էդվարդ Նալբանդյանն առանձին հանդիպումներ ունեցավ նաեւ Հայ կաթողիկե եկեղեցու պատրիարք ամենապատիվ եւ գերերջանիկ Տ.Տ. Ներսես Պետրոս ԺԹ-ի եւ Մերձավոր Արեւելքի Հայ Ավետարանական եկեղեցիների միության նախագահ Վերապատվելի Մկրտիչ Կարագյոզյանի հետ:

Փետրվարի 25-ի երեկոյան տեղի ունեցավ Էդվարդ Նալբանդյանի հանդիպումը Լիբանանի հայ համայնքային կառույցների ներկայացուցիչների հետ, որի ընթացքում ՀՀ արտգործնախարարը պատասխանեց լիբանանահայությանը հուզող բազմաթիվ հարցերի:

Հայ համայնքի ներկայացուցիչների հետ հանդիպումից հետո ՀՀ արտգործնախարարը մեկնեց Դամասկոս, ուր փետրվարի 26-ին նախատեսված են Էդվարդ Նալբանդյանի հանդիպումները Սիրիայի բարձրաստիճան ղեկավարության հետ: