Հարց. Ինչպես կմեկնաբանեք «Հյուրիեթ» թերթում հրապարակված լուրը, Թուրքիայի միջնորդությամբ ԼՂ հարցում ձեռք բերված պայմանավորվածությունների վերաբերյալ:

Պատասխան. Թուրքական «Հյուրիեթի» այդ հրապարակումը պարզ ապատեղեկատվություն է: Թուրքիայի միջնորդությամբ արցախյան հիմնախնդրի վերաբերյալ բանակցություններ չեն վարվել եւ չեն վարվում: Ինչպես բազմիցս նշվել է, Լեռնային Ղարաբաղի հիմնախնդրի կարգավորման վերաբերյալ բանակցություններն ընթանում են ԵԱՀԿ Մինսկի խմբի համանախագահների միջնորդությամբ` Մադրիդյան առաջարկությունների հիման վրա: Լեռնային Ղարաբաղի հակամարտության կարգավորման շուրջ հայաստանյան իշխանությունների մոտեցումները հստակ են եւ տարբեր առիթներով ներկայացվել են ինչպես Հանրապետության Նախագահի, այնպես էլ Արտաքին գործերի նախարարի կողմից: Կարգավորման սկզբունքների շուրջ որեւէ պայմանավորվածություն այսօր չկա: Բազմիցս ասվել է, ու դա ակնհայտ է, որ որեւէ համաձայնության կամ պայմանավորվածության պարագայում այդ մասին առաջին հերթին կտեղեկացվի հենց մեր` Հայաստանի ու Լեռնային Ղարաբաղի հանրությունը: