ՀՀ ԱԳ նախարար Էդվարդ Նալբանդյանն այցելեց Արցախ
20 դեկտեմբերի, 2008Դեկտեմբերի 19-ին ՀՀ արտգործնախարար Էդվարդ Նալբանդյանը մեկօրյա այցով ժամանեց Ստեփանակերտ:
Նույն օրը երեկոյան Էդվարդ Նալբանդյանին ընդունեց ԼՂՀ նախագահ Բակո Սահակյանը: Հանդիպման ժամանակ քննարկվեցին արցախյան հիմնախնդրի կարգավորման վերջին զարգացումները:
Նախարար Նալբանդյանը Արցախի նախագահին ներկայացրեց Հելսինկիում տեղի ունեցած ԵԱՀԿ արտգործնախարարների խորհրդի հանդիպման արդյունքները եւ Ֆինլանդիայի մայրաքաղաքում ԵԱՀԿ Մինսկի խմբի համանախագահների եւ Ադրբեջանի արտգործնախարար Էլմար Մամադյարովի հետ ունեցած հանդիպման մանրամասները:
Զրուցակիցները բարձր գնահատեցին Հելսինկիում ԵԱՀԿ Մինսկի խմբի համանախագահ երկրների արտաքին քաղաքական գերատեսչությունների ղեկավարների եւ ԵԱՀԿ արտգործնախարարների խորհրդի հայտարարությունները արցախյան հիմնախնդրի կարգավորման վերաբերյալ:
Դեկտեմբերի 20-ի առավոտյան Էդվարդ Նալբանդյանն այցելեց Արցախի պետական համալսարան, ուր նախ ծաղիկներ դրեց արցախյան պատերազմի ժամանակ զոհված համալսարանականների հուշաքարին:
Հայաստանի արտաքին քաղաքական գերատեսչության ղեկավարը ելույթ ունեցավ ԱրՊՀ պրոֆեսորադասախոսական կազմի եւ ուսանողների առջեւ: Իր խոսքում Էդվարդ Նալբանդյանը ներկայացրեց արցախյան հիմնախնդրի հանգուցալուծմանն ուղղված բանակցային գործընթացը եւ հեռանկարները:
Էդվարդ Նալբանդյանը պատասխանեց նաեւ ուսանողների բազմաթիվ հարցերին:
Անդրադառնալով արցախյան հիմնախնդրի կարգավորման գործընթացում ԼՂՀ իշխանությունների մասնակցության հարցին, նախարար Նալբանդյանը շեշտեց, որ առանց բանակցություններին արցախյան կողմի լիակատար մասնակցության որեւիցե պայմանավորվածություն չի կարող ձեռք բերվել:
Արցախի մայր ԲՈւՀ-ում նախարար Նալբանդյանը ճեպազրույց ունեցավ տեղական լրագրողների հետ:
Հայաստանի արտգործնախարարը հանդիպումներ ունեցավ նաեւ ԼՂՀ Ազգային ժողովի նախագահ Աշոտ Ղուլյանի եւ ԼՂՀ ԱԳ նախարար Գեորգի Պետրոսյանի հետ:
