Սփյուռքի պետական կոմիտեի նախագահ Հրանուշ Հակոբյանն ընդունեց ԱՄՆ-ից ժամանած հայ ազգային հասարակական գործիչ, «Կալիֆորնիա կուրիեր» թերթի խմբագիր Հարութ Սասունյանին:

Հանդիպման ընթացքում կարծիքներ փոխանակվեցին Հայաստան-Սփյուռք գործակցության հեռանկարների շուրջ, ինչպես նաեւ քննարկվեցին այդ ոլորտում առկա փաստաթղթերը եւ առաջարկվող ծրագրերը:

Տիկին Հակոբյանը բարձր գնահատեց Հարութ Սասունյանի դերը` Սփյուռքում հայապահպանության, ազգային հիմնախնդիրների եւ լուծման ենթակա հարցերի բարձրաձայնման եւ ազգային շահերի պաշտպանման գործում:

Զրուցակիցների կողմից երկուստեք մտքեր փոխանակվեցին հոկտեմբերի 1-ին ստեղծվելիք Սփյուռքի հարցերի նախարարության կազմի եւ աշխատանքների կազմակերպման ձեւերի եւ մեթոդների մասին:

Հարութ Սասունյանը դասախոսությամբ հանդես եկավ նաեւ Սփյուռքի պետական կոմիտեի աշխատակազմի առջեւ: Նա աշխատակիցների ուշադրությունը հրավիրեց Հայաստան-Սփյուռք գործակցության զարգացման ուղիների վրա, ինչպես նաեւ անդրադարձավ համազգային հիմնախնդիրների վերաբերյալ իր նոր մոտեցումներին: Աշխույժ մթնոլորտում անցած զրույց-դասախոսության ընթացքում պարոն Սասունյանը պատասխանեց Սփյուռքի պետական կոմիտեի աշխատակիցների բազմաթիվ հարցերին:

Ամփոփելով հանդիպումը` Սփյուռքի պետական կոմիտեի նախագահը հանդիպումը բնորոշեց որպես «Սասունյանական դասեր» եւ ընդգծեց յուրաքանչյուր աշխատակցի կողմից այդ «դասերից» օգտվելու կարեւորությունը: