ՀՀ ԱԳՆ ստորաբաժանումների կողմից շարունակական աշխատանքներ են տարվում ՀՀ քաղաքացիներին Վրաստանից հայրենիք վերադարձնելու ուղղությամբ:

Ս.թ. օգոստոսի 10-ի ժամը 18:00-ի դրությամբ Վրաստանում տեղի ունեցող իրադարձությունների ընթացքում Հայաստանի քաղաքացիներ չեն տուժել:

Հայաստանի աջակցությամբ շարունակվում է նաեւ Վրաստանում գտնվող օտարերկրացիների տեղափոխումը Երեւան: Ներկա դրությամբ հայ-վրացական սահմանը հատել են 130 ԱՄՆ, 180 Լեհաստանի, ինչպես նաեւ այլ երկրների հարյուրավոր քաղաքացիներ: Այսօր սպասվում է Իտալիայի 130 քաղաքացիների ժամանումը:

Որոշում է կայացվել Վրաստանից Հայաստան ժամանող օտարերկրյա քաղաքացիներին մուտքի արտոնագրեր տրամադրել անվճար, ինչպես նաեւ տարանցիկ հատուկ չվերթներով «Զվարթնոց» օդանավակայանից մեկնող Վրաստանից ժամանած օտարերկրյա քաղաքացիներին ազատել օդային ուղեւորների ելքի տուրքից:

Հանձնարարական է տրված սահմանային եւ մաքսային ծառայություններին առավելագույն օժանդակություն ցուցաբերելու եւ գործողությունները դյուրացնելու համար:

Հայաստանի ԱԳՆ-ում գործող շուրջօրյա թեժ գծերը, որոնցով ստացվել են Հայաստանից եւ այլ երկրներից հազարավոր զանգեր, շարունակում են գործել: