Ս.թ. հուլիսի 15-ին Մոմջյան բարեգործական հիմնադրամի ղեկավար պարոն Ռոմեն Կոզմանյանը եւ «Մուղնի» հրատարակչության ղեկավար տիկին Ռուզան Պետրոսյանը Սփյուռքի հետ կապերի պետական կոմիտեին հանձնեցին ավելի քան 150 անուն գրականություն: Այդ աշխատությունների մեծ մասը Սփյուռքի մեր գիտնականների եւ հրապարակախոսների գործերն են, ինչպես եւ Սփյուռքին եւ նրա պատմությանը վերաբերող աշխատություններ:

Հրանուշ Հակոբյանը շնորհակալություն հայտնեց նման նվիրատվության համար եւ շեշտեց, որ կոմիտեի աշխատանքի առանահերթությունների թվում է տեղեկատվության կուտակումն ու տարածումը, եւ, հետեւաբար, մեծ է սեփական գրադարան հիմնելու ցանկությունը: Նա ընդգծեց Սփյուռքի մեր հայրենակիցներին վերաբերող տեղեկատվական ընդգրկուն բազայի ստեղծման անհրաժեշտությունը, յուրօրինակ համահայկական մարդահամարի անցկացումը, ինչը թույլ կտա ավելի սերտացնել արտերկրի հայ համայնքների կապը հայրենիքի հետ:

Ռոմեն Կոզմանյանը եւ Ռուզան Պետրոսյանը ողջունեցին Սփյուռքի հետ կապերի պետական կոմիտեի նախաձեռնությունը գրադարանի ստեղծման ուղղությամբ եւ հաջողություն մաղթեցին կոմիտեի գործունեությանը: