Նախարար Նալբանդյանին ուղղված Վատիկանի վարչապետ Կարդինալ Տարչիզիո Բերտոնեն շնորհավորական ուղերձում նշված է. «Մեծ հաճույքով շնորհավորում եմ Ձերդ գերազանցությանը ՀՀ արտաքին գործերի նախարարի պաշտոնում նշանակվելու կապակցությամբ` մաղթելով Ձեզ ամենայն հաջողություն Ձեր նոր առաքելության մեջ: Հուսով եմ, որ այլ երկրների հետ հարաբերություններում, Հայաստանը կշարունակի գործել իր երկարամյա քրիստոնեական ավանդույթների ոգով»:
Էդվարդ Նալբանդյանին իր սրտագիր շնորհավորանքներն է հղել նաեւ Վատիկանի փոխվարչապետ արքեպիսկոպոս Ֆերնանդո Ֆիլոնին:
Ճապոնիայի ԱԳ նախարար Մասախիկո Կոմուրայի նամակում ասված է. «Սրտանց շնորհավորում եմ Ձեզ ՀՀ ԱԳՆ ղեկավարի պաշտոնում նշանակվելու կապակցությամբ: Ես պատրաստ եմ համագործակցել Ձեզ հետ հայ-ճապոնական երկկողմ հարաբերությունները զարգացնելու եւ ամրապնդելու ուղղությամբ»:
Միացյալ Թագավորության արտաքին գործերի եւ համագործակցության նախարար Դեյվիդ Միլիբանդը հաջողություններ է մաղթել նախարար Նալբանդյանին եւ նշել, որ Միացյալ Թագավորությունը շարունակելու է աջակցել Հարավային Կովկասում հակամարտությունների խաղաղ կարգավորմանը եւ ողջ տարածաշրջանում բարիդրացիական հարաբերությունների զարգացմանը:
Լեհաստանի ԱԳ նախարար Ռադոսլավ Շիկորսկին իր նամակում գրում է. «Ես վստահ եմ, որ մենք շատ բան ունենք միմյանց տալու տնտեսական, քաղաքական եւ մշակութային ոլորտներում համագործակցությամբ: Ես կարող եմ վերահաստատել, որ մենք ցանկանում ենք զարգացնել եւ ընդլայնել մեր հարաբերությունները ի շահ մեր երկրների եւ ազգերի»:
Լատվիայի ԱԳ նախարար Մարիս Ռիեկստինսն իր ուղերձում ասում է. «Վստահ եմ, որ մեր երկարատեւ բարեկամական հարաբերությունների զարգացումն ու խորացումը իրականացվում է ի շահ մեր երկու երկրների, եւ ես օգտվելով առիթից` իմ խորը վստահությունն եմ հայտնում, որ Դուք կկարողանաք շարունակել եւ ամրապնդել Լատվիայի եւ Հայաստանի համագործակցությունը»:
«Վստահ եմ, որ մեր երկու երկրների արտաքին քաղաքականության գերատեսչությունների ջանքերը կուղղվեն Ղազախստանի եւ Հայաստանի գործընկերության եւ բարեկամության ամրապնդմանը: Ցանկանում եմ Ձեզ հաջողություն այդքան պատասխանատու պաշտոնում, իսկ հայ ժողովրդին` բարգավաճում եւ բարօրություն»,- նշում է իր նամակում Ղազախստանի ԱԳ նախարար Մարատ Տաժինը:

Շնորհավորելով Էդվարդ Նալբանդյանին ԱԳ նախարար նշանակվելու կապակցությամբ` Նիսի քաղաքապետ Քրիստիան Էստրոզին իր ուղերձում նշում է. «Իմ թիմն ու ես Ձեր ամբողջական տրամադրության տակ ենք, որպեսզի աջակցենք ցանկացած նախաձեռնության` ուղղված մեր երկու երկրների հարատեւ եւ հեռահար գործակցության զարգացմանը»: