ՆԱՏՕ-ի Ճգնաժամերի կառավարման համակարգի գործունակության ապահովման նպատակով ՆԱՏՕ-ի կողմից պարբերաբար կազմակերպվում եւ անց են կացվում Ճգնաժամերի կառավարման վարժանքներ /CMX/: Այս վարժանքների սցենարներն իրենց մեջ ներառում են ճգնաժամերի լայն սպեկտր, սկսած բնական աղետներից մինչեւ ահաբեկչություն եւ պատերազմական իրավիճակ: Վարժանքները տեսական են եւ անց են կացվում ՆԱՏՕ-ի կենտրոնակայանում` դաշինքի անդամ — գործընկեր պետությունների համար:
Գործընկեր պետությունները կարող են մասնակցել վարժանքին նաեւ ազգային միջոցառմամբ: ՆԱՏՕ-ի վարժանքին ազգային վարժանքով մասնակցելը կարեւորվում է Հայաստանում Ճգնաժամերի կառավարման ազգային կենտրոնի ստեղծման ենթատեքստում: Սա հնարավորություն կտա Հայաստանին նախ եւ առաջ Ճգնաժամերի կառավարման կենտրոնի կազմավորման սկզբնական փուլում փորձարկել կենտրոնի հնարավորությունները, կենտրոնում ներգրավված գերատեսչությունների համաձայնեցված եւ արդյունավետ գործելու ունակությունը ազգային եւ միջազգային մակարդակներում, ներգրավվել ՆԱՏՕ-ի եւ գործընկեր պետությունների համապատասխան կառույցների հետ համագործակցության մեջ:

Վարժանքի ակտիվ փուլն անց է կացվելու 2008թ. ապրիլի 16-ից 22-ը, որին Հայաստանի Հանրապետությունը կմասնակցի իր ազգային սցենարով: Սցենարի խաղարկումը ՀՀ արտաքին գործերի — պաշտպանության նախարարությունների, ՀՀ տարածքային կառավարման նախարարության Հայաստանի փրկարար ծառայության, ՀՀ կառավարությանն առընթեր Ազգային անվտանգության ծառայության — Ոստիկանության ներկայացուցիչների մասնակցությամբ, կկայանա ս.թ. ապրիլի 19-ին ՀՀ տարածքային կառավարման նախարարության Հայաստանի փրկարար ծառայության Ճգնաժամերի կառավարման պետական ակադեմիայի շենքում (հասցե` Աճառյան 1): Վարժանքի սկիզբը նախատեսված է ժամը 11:30-ին: Մանրամասների համար դիմել ՀՀ Փրկարար ծառայության տնօրենի խորհրդական, «Արտակարգ ալիք» լրատվական կենտրոնի տնօրեն Նիկոլայ Գրիգորյանին, հեռ.`567- 656: