Մարտի 14-ին ՄԱԿ-ի Գլխավոր Ասամբլեան քվեարկեց Ադրբեջանի ներկայացրած մի բանաձեւի վերաբերյալ, որի նպատակն էր միջազգային աջակցություն ապահովել ԼՂ հիմնախնդրին վերաբերող ադրբեջանական մեկնաբանություններին:

ԵԱՀԿ ՄԽ համանախագահ երկրները` ԱՄՆ-ն, Ֆրանսիան եւ Ռուսաստանը, ինչպես նաեւ Հայաստանը եւ մի քանի այլ երկրներ դեմ քվեարկեցին այդ բանաձեւի նախագծին: Մոտ 150 երկիր ձեռնպահ մնաց կամ չմասնակցեց քվեարկությանը, եւ միայն 39 երկիր աջակցեց բանաձեւին: Այդ երկրները կամ ՎՈւԱՄ, կամ էլ Իսլամական Կոնֆերանս կազմակերպության անդամ երկրներն են:

Չնայած այն հանգամանքին, որ չպարտավորեցնող բանաձեւը ընդունվեց ԳԱ կողմից` այդուամենայնիվ Ադրբեջանի դիրքորոշման մերժումը մեծամասնության կողմից ԼՂ հիմնախնդրի վերաբերյալ միջազգային հանրության տրամադրությունների իրական ցուցանիշն է:

Գնահատելով քվեարկության արդյունքները` ԱԳ նախարար Վարդան Օսկանյանն ասաց. «Ես հուսով եմ, որ Ադրբեջանը հստակ գնահատական ստացավ միջազգային հանրությունից: Համանախագահների առաջնորդությամբ ՄԱԿ-ի անդամ երկրների մեծամասնությունը մերժեց միակողմանի մոտեցումը»:

Նախարար Օսկանյանը բանաձեւը բնութագրեց որպես երկերեսանի. «Մի կողմից այն փորձում է ապատեղեկացնել, քանզի ներառում է ԵԱՀԿ Մինսկի գործընթացին սատարող դրույթ: Մյուս կողմից Ադրբեջանը ցուցադրաբար հեգնեց ԵԱՀԿ ՄԽ համանախագահների դիրքորոշումը: Համանախագահները հստակ հայտարարեցին, որ չեն սատարելու բանաձեւի նախագիծը, եւ փաստորեն, դեմ քվեարկեցին»:

«Մեզ հիմա հետաքրքիր են Ադրբեջանի հաջորդ քայլերը», - ասաց նա: «Մենք ուզում ենք պարզել` արդյոք այս բանաձեւի նպատակն էր կազմաքանդել բանակցային գործընթացը, թե այժմ միջազգային հանրության գնահատականը ստանալուց հետո նրանք կվերադառնան բանակցությունների սեղանի շուրջ` աշխատելու փոխզիջումների վրա հիմնված կայուն կարգավորում գտնելու համար»:

Այս շաբաթվա սկզբին մամուլի ասուլիսի ընթացքում նախարար Օսկանյանը հայտարարեց, որ նորընտիր նախագահ Սերժ Սարգսյանը պատրաստ է հանդիպել Ադրբեջանի նախագահին առաջին իսկ հնարավորության դեպքում, իհարկե, եթե նման առաջարկություն լինի համանախագահներից, եւ Ադրբեջանը տա իր համաձայնությունը: «Նման հնարավորություն կա», - ասաց նախարար Օսկանյանը: «Գնդակը Ադրբեջանի խաղադաշտում է»:

«Մերժելով Ադրբեջանի ներկայացրած բանաձեւը` միջազգային հանրությունը հաստատեց իր հավանությունը այսօր բանակցությունների սեղանին առկա փաստաթղթի վերաբերյալ, որը հաջող կերպով միաբանում է առաջին հայացքից իրարամերժ թվացող Հելսինկիի Եզրափակիչ ակտի երկու` ազգերի ազատ ինքնորոշման եւ տարածքային ամբողջականության սկզբունքները», - պարզաբանեց Հայաստանի ԱԳ նախարարը: «Այս փաստաթուղթը հայերի եւ ադրբեջանցիների համար առաջ շարժվելու ունիկալ հնարավորություն է ընձեռում: Սա հենց այն է, ինչը ԼՂ հիմնախնդիրը տարբերակում է մեր տարածաշրջանում եւ Եվրոպայում առկա մյուս բոլոր հակամարտություններից եւ այն յուրահատուկ է դարձնում ոչ միայն իրավական եւ պատմական տեսանկյունից, այլեւ բանակցային նորարար մոտեցմամբ, որի նպատակն է գտնել իրատեսական հանգուցալուծում»:

Նույն օրը, ավելի վաղ նախարար Օսկանյանը հանդիպել է ՄԽ համանախագահների հետ, որոնց հետ քննարկել է բանակցային գործընթացի վերսկսման հնարավորությունը, ՄԱԿ-ի ԳԱ բանաձեւը, ինչպես նաեւ իրավիճակը ԼՂ եւ Ադրբեջանի շփման գծում:-