Ս.թ. մարտի 12-ին ՀՀ ԱԳ նախարար Վարդան Օսկանյանն ընդունեց Եվրոպայի Խորհրդի Մարդու իրավունքների հանձնակատար Թոմաս Համմարբերգի գլխավորած պատվիրակությանը:

Հանդիպման մասնակիցներն անդրադարձան Հայաստանում անցկացված նախագահական ընտրություններին եւ հետընտրական զարգացումներին:

Հյուրի խնդրանքով նախարար Օսկանյանը ներկայացրեց մարտի 1-ի եւ այդ օրվան հաջորդած իրադարձությունները, Երեւանում արտակարգ դրության պայմաններում մարդու իրավունքների պաշտպանության վիճակը: Երկուստեք նշվեց նաեւ, որ պետք է ձեռնարկել բոլոր անհրաժեշտ քայլերը իրադրության շուտափույթ կարգավորման համար:

Նախարարը տեղեկացրեց նաեւ, որ մոտ օրերս կվերացվեն ԶԼՄ-երի վերաբերյալ սահմանափակումները:

Պրն. Համմարբերգը նշեց, որ ինքը հանդիպումներ է ունենալու իշխանության բոլոր թեւերի ներկայացուցիչների, նաեւ ընդդիմության ղեկավարների հետ, այցելելու է մեկուսարաններ եւ հիվանդանոցներ, ինչը հնարավորություն կընձեռի իրատեսական պատկերացում կազմել երկրում ընթացող գործընթացների մասին: