Ս.թ. փետրվարի 25-ին ՀՀ ԱԳ նախարար Վարդան Օսկանյանն ընդունեց Սլովակիայի ԱԳ նախարար, Եվրոպայի Խորհրդի նախարարների կոմիտեի նախագահ Յան Կուբիշի (Jaոn Kubis) գլխավորած պատվիրակությանը:

Հանդիպման ընթացքում կողմերն անդրադարձան Հայաստանում կայացած նախագահական ընտրություններին: Սլովակիայի ԱԳ նախարարը հայտնեց, որ իր այցի ժամկետները պատահական չեն ընտրված, իր ցանկությունն է եղել այցելել ընտրություններից մի քանի օր անց տեղում իրավիճակը ուսումնասիրելու եւ պատկերացում կազմելու համար: Հյուրի խնդրանքով, նախարար Օսկանյանը ներկայացրեց Հայաստանում հետընտրական զարգացումները, բողոքարկման եւ վերահաշվարկի գործընթացի արդյունքները:

Այնուհետեւ կողմերն անդրադարձան երկկողմ հարաբերություններին: Երկուստեք նշվեց տնտեսական հարաբերությունների զարգացման մեծ ներուժը, եւ կարեւորվեց իրավապայմանագրային դաշտի շուտափույթ ընդլայնումը: Յան Կուբիշը տեղեկացրեց, որ այս տարվա ընթացքում Հայաստան են ծրագրում այցելել Սլովակիայի կառավարության երեք անդամ, ինչը լուրջ խթան կհանդիսանա երկու երկրների միջեւ բազմաբնույթ հարաբերությունների հետագա զարգացման համար:

Նախարարները քննարկեցին նաեւ Հայաստան-Եվրոպական Միություն հարաբերությունները եւ Եվրոպական Հարեւանության քաղաքականության Գործողությունների ծրագրի կատարման ընթացքը:

Հյուրի խնդրանքով նախարար Օսկանյանը ներկայացրեց հայ-թուրքական հարաբերությունների կարգավորման վերաբերյալ ՀՀ մոտեցումները, ինչպես նաեւ ԼՂ հիմնախնդրի կարգավորման բանակցությունների ընթացքն ու հեռանկարները: Անդրադարձ կատարվեց նաեւ Կոսովոյի շուրջ զարգացումներին:

Հանդիպմանը հաջորդեց համատեղ մամուլի ասուլիս:

Ասուլիսի ձայնագրությունը ունկնդրելու համար սեղմեք այստեղ: |