Մադրիդում ԵԱՀԿ ԱԳ նախարարների խորհրդի նիստին մասնակցող ՀՀ ԱԳ նախարար Վարդան Օսկանյանը նոյեմբերի 30-ին հանդիպել է Շվեյցարիայի Համադաշնության նախագահ, արտաքին հարաբերությունների դաշնային դեպարտամենտի ղեկավար Միշել Քալմի Ռեյի հետ:

Զրուցակիցները քննարկել են հայ-շվեյցարական երկկողմ հարաբերությունները, անդրադարձել են տարածաշրջանային խնդիրներին, հարեւանների հետ Հայաստանի հարաբերություններին եւ ԼՂ հիմնահարցի կարգավորման գործընթացին: Հյուրի խնդրանքով նախարար Օսկանյանը ներկայացրել է նախագահական ընտրություններից առաջ Հայաստանի ներքաղաքական իրավիճակը:

Վարդան Օսկանյանը հանդիպել է նաեւ ՆԱՏՕ-ի գլխավոր քարտուղարի հատուկ ներկայացուցիչ Ռոբերտ Սիմոնսի հետ: Կողմերն անդրադարձել են Հայաստան-ՆԱՏՕ գործակցությանը, քննարկել են Անհատական գործընկերության գործողությունների ծրագրին վերաբերող հարցեր: Ռոբերտ Սիմոնսն ընդգծել է Հարավային Կովկասի երկրներում ՆԱՏՕ-ի կապի սպա Զբիգնեւ Ռիբացկու Հայաստան կատարած վերջին այցի, բոլոր գերատեսչություններում ունեցած հանդիպումների, նաեւ նոյեմբերի
20-22-ը ՆԱՏՕ-ի կենտրոնակայան Հայաստանի պատվիրակության այցի արդյունավետությունը:

Նախարար Օսկանյանը հանդիպել է նաեւ ԵԱՀԿ Ժողովրդավարական հաստատությունների եւ մարդու իրավունքների գրասենյակի (ԺՀՄԻԳ) տնօրեն Քրիստիան Շտրոհալի հետ: Զրուցակիցները քննարկել են Հայաստանում կայանալիք նախագահական ընտրություններին եւ ԺՀՄԻԳ դիտորդական առաքլեւոյթամբ ընտրթյուններին մասնակցելու ձեւաչափին վերաբերող հարցեր:

Վարդան Օսկանյանի հաջորդ հանդիպումը Ռումինիայի ԱԳ նախարար Ադրիան Սիորիանուի հետ էր: Երկու երկրների արտգործնախարարները քննարկել են երկկողմ հարաբերությունների օրակարգը, ընգծել հարաբերություններում առկա մեծ ներուժը: Ռումինիայի ԱԳ նախարարը ցանկություն է հայտնել այցելել Հայաստան: Կողմերը մտքեր են փոխանակել նաեւ ԼՂ բանակցային գործընթացի եւ Կոսովոյի հիմնահարցի վերաբերյալ:
Նախարար Օսկանյանը հանդիպել է նաեւ ԱՄՆ պետքարտուղարի տեղակալ Նիկոլաս Բըրնսին, որի հետ քննարկել է ԼՂ հիմնախնդիրը, Հայաստան- Թուրքիա հարաբերությունները: Կողմերը ճշգրտել են ԵԱՀԿ ԱԳ նախարարների խորհրդի նիստին ընդունվելիք փաստաթղթերի վերաբերյալ դիրքորոշումները:

ԵԱՀԿ գործող նախագահ Իսպանիայի արտգործնախարար Միգել Մորատինոսի նախաձեռնությամբ նախարար Օսկանյանը հանդիպել է Ադրբեջանի ԱԳ նախարար Էլմար Մամեդյարովի եւ Մինսկի խմբի համանախագահների հետ: ԵԱՀԿ գործող նախագահը իր զորակցություն է հայտնել ՄԽ շրջանակներում ԼՂ հիմնախնդրի կարգավորման բանակցություններին եւ հորդորել շարունակել ակտիվ բանակցությունները: