Մադրիդում ԵԱՀԿ ԱԳ նախարարների խորհրդի նիստին մասնակցող ՀՀ ԱԳ նախարար Վարդան Օսկանյանը ս.թ. նոյեմբերի 28-ին եւ 29-ին ունեցավ մի շարք հանդիպումներ:
Նոյեմբերի 28-ին ԵԱՀԿ Մինսկի խմբի համանախագահների նախաձեռնությամբ եւ մասնակցությամբ տեղի ունեցավ ճաշ-հանդիպում Ադրբեջանի ԱԳ նախարար Է. Մամեդյարովի հետ: Քննարկվեցին ԵԱՀԿ ԱԳ նախարարների խորհրդի աշխատանքներին վերաբերող հարցեր, ինչպես նաեւ խորհրդի կողմից նոյեմբերի 30-ին ընդունվելիք հռչակագրում Լեռնային Ղարաբաղի հիմնահարցին վերաբերող պարբերության տեքստը:

Կողմերը նաեւ բանակցեցին ԼՂ խաղաղ գործընթացի դեռեւս չհամաձայնեցված հարցերը:
Քննարկումները շարունակվեցին հաջորդ օրը ԵԱՀԿ Մինսկի խմբի համանախագահող երկրների` Ռուսաստանի եւ Ֆրանսիայի արտաքին գերատեսչությունների ղեկավարներ Ս. Լավրովի ու Բ. Կուշների, ԱՄՆ-ի` պետքարտուղարի տեղակալ Ն. Բըրնսի մասնակցությամբ: Վերջիններս, հակիրճ գնահատական տալով Լեռնային Ղարաբաղի հակամարտության կարգավորման վերջին շրջանի բանակցային գործընթացին, ՀՀ եւ Ադրբեջանի արտգործնախարարներին փոխանցեցին հակամարտության կարգավորման հիմնական սկզբունքների տեքտսը: Դրանում կողմերի չհամաձայնեցված հարցերի շուրջ ներկայացված են համանախագահների առաջարկությունները: Ակնկալվում է, որ համանախագահները կայցելեն տարածաշրջան` ծանոթանալու նախագահների մոտեցումներին ներկայացված առաջարկությունների վերաբերյալ:
ՀՀ ԱԳ նախարարի հաջորդ զրուցակիցը ԵԱՀԿ գլխավոր քարտուղար Մարկ Բրիշամբոն էր: Հանդիպմանը քննարկվեցին ԵԱՀԿ բարեփոխումներին եւ Լեռնային Ղարաբաղի հիմնախնդրի կարգավորմանը վերաբերող հարցեր: Խոսվեց նաեւ Հայաստանում առաջիկա ընտրություններում դիտորդական առաքելությամբ ԵԱՀԿ մասնակցության ձեւաչափի մասին:
Իսլանդիայի ԱԳ նախարար Ինգիբյորգ Գիլսադոտիրի (Ingibjorg Solrum Gilsadottir) հետ հանդիպման ընթացքում նախարար Օսկանյանը կարեւորեց երկկողմ հարաբերությունների ակտիվացումը, հատկապես միջազգային կազմակերպությունների շրջանակում: Նախարար Օսկանյանը ներկայացրեց Լեռնային Ղարաբաղի հակամարտության կարգավորման գործընթացի վերջին զարգացումները:
ԵԱՀԿ նախագահ Իսպանիայի արտգործնախարար Մ. Մորատինոսի հետ հանդիպմանը քննարկվեցին ԵԱՀԿ ԱԳ նախարարների ընթացող նիստին վերաբերող խնդիրներ, ինչպես նաեւ Լեռնային Ղարաբաղի հիմնախնդրին վերաբերող հարցեր:
Օրվա վերջին նախատեսվում է ՀՀ ԱԳ նախարարի հանդիպումները Ղազախստանի ԱԳ նախարար Մ. Թաժինի եւ ԱՄՆ պետքարտուղարի տեղակալ Ն. Բըրնսի հետ:

ԵԱՀԿ ԱԳ նախարարների խորհրդի նիստի ընթացքում նախատեսվում է նախարար Օսկանյանի ելույթը:

Ելույթի աուդիո տարբերակներ: