Այսօր ՀՀ արտաքին գործերի նախարար Վարդան Օսկանյանն ընդունեց Հայաստանում աշխատանքային այցով գտնվող ԵԱՀԿ Ժողովրդավարական հաստատությունների եւ մարդու իրավունքների գրասենյակի (ԺՀՄԻԳ) տնօրեն Քրիստիան Շտրոհալի գլխավորած պատվիրակությանը: Այցը հիմնականում նպատակ ունի քննարկելու ՀՀ-ում անցկացված խորհրդարանական ընտրությունների վերաբերյալ ԵԱՀԿ/ԺՀՄԻԳ ընտրություների դիտորդական առաքելության վերջնական զեկույցում նշված խնդիրները եւ ներկայացված առաջարկությունները, ինչպես նաեւ ծանոթանալու դրանց ուղղությամբ ձեռնարկված քայլերին:

Հանդիպման ժամանակ կրկին անգամ արձանագրվեց խորհրդարանական ընտրությունների ժամանակ ձեռք բերված հաջողությունը եւ կարեւորվեց դրա պահպանումն ու բարելավումը առաջիկա նախագահական ընտրությունների ժամանակ:

ՀՀ ԱԳ նախարարը շնորհակալություն հայտնեց ԵԱՀԿ գրասենյակի կողմից ընտրությունների նախապատրաստման շրջանում ցույց տրված աջակցության, մասնավորապես` անցկացված վերապատրաստման եւ ԿԸՀ-ին տրամադրված օժանդակության համար, ինչն իր դրական ներդրումն է ունեցել ընտրությունների հաջող անցկացման գործում:

Պրն. Շտրոհալը իր գրասենյակի պատրաստակամությունը հայտնեց շարունակելու նման գործունեությունը` արդեն իսկ ձեռք բերվածը ամրապնդելու եւ ընտությունների գործընթացը առավել բարելավելու համար: