Ս.թ. հուլիսի 25-ին Արգենտինայում Հայաստանի դեսպանությունը կազմակերպել է ընդունելություն` ՀՀ նախագահ Ռոբերտ Քոչարյանի հրամանագրով Անանիա Շիրակացու մեդալով պարգեւատրված Հայաստան համահայկական հիմնադրամի արգենտինյան հանձնախմբի նախագահ Խորխե Վարդպարոնյանին շքանշանի հանդիսավոր հանձնման կապակցությամբ:

Միջոցառմանը ներկա են եղել Հայաստան հիմնադրամի Բուենոս Այրեսի հանձնախմբի անդամները, համայնքային կառույցների ներկայացուցիչներ, լրագրողներ:

Շքանշանը հանդիսավոր հանձնել է Արգենտինայում Հայաստանի դեսպան Վլադիմիր Կարմիրշալյանը: Շնորհավորական խոսքում դեսպանը նշել է, որ Խորխե Վարդպարոնյանը պարգեւատրվում է Անանիա Շիրակացու մեդալով` Հայաստան համահայկական հիմնադրամի կողմից իրականացվող` Հայաստանի եւ Արցախի զորացման ծրագրերի կենսագործման ընթացքում ներդրած նշանակալի ավանդի համար եւ հիմնադրամի ստեղծման 15-ամյակի կապակցությամբ:

Դեսպանը նաեւ կարեւորել է Վարդպարոնյանի դերը Արգենտինայի կոնգրեսի կողմից Հայոց ցեղասպանության վերաբերյալ օրենքի ընդունման գործում: