Ս.թ. հունիսի 20-ին ՀՀ ԱԳ նախարար Վարդան Օսկանյանն ընդունեց Հարավային Կովկասի հարցերով ՆԱՏՕ-ի գլխավոր քարտուղարի հատուկ ներկայացուցիչ, դեսպան Ռոբերտ Սիմոնսին:

Հանդիպման սկզբում նախարարը կարեւորեց արտաքին քաղաքականության եւ անվտանգության հարցերի վերաբերյալ Դաշինքի հետ քաղաքական խորհրդակցությունների պարբերաբար անցկացումը:

Այնուհետեւ մտքերի փոխանակում տեղի ունեցավ Հայաստան-ՆԱՏՕ համագործակցության Անհհատական գործնկերության գործողությունների ծրագրի (ԱԳԳԾ) իրագործման շուրջ: Տեղեկացնելով, որ հունիսի 22-ին մասնակցելու է ԱԳԳԾ հայաստանյան հանձնաժողովի նիստին, դեսպան Սիմոնսը բարձր գնահատեց Հայաստանի ջանքերը Ծրագրի իրագործման ուղղությամբ, ինչպես նաեւ Հայաստանի խաղաղապահների ծառայությանը Կոսովոյում:

Նախարար Օսկանյանը նշեց, որ ԱԳԳԾ համապարփակ բնույթի փաստաթուղթ է եւ ընդգրկում է Դաշինքի հետ համագործակցության բոլոր հնարավոր ոլորտները: Միեւնույն ժամանակ Ծրագիրը դիտվում է ինչպես ՆԱՏՕ-ի հետ քաղաքական երկխոսության զարգացման եւ ամրապնդման կարեւորագույն միջոց, այնպես ել` Դաշինքի անդամ պետությունների հետ երկկողմ համագործակցության խթանման մեխանիզմ:

Դեսպան Սիմոնսը անդրադարձավ տարածաշրջանային անվտանգության հետ առնչվող զարգացումներին, ՆԱՏՕ-Ռուսաստան երկխոսությանը, Դաշինքի կողմից իրականացվող խաղաղապահ գործողություններին, օրերս Բրյուսելում տեղի ունեցած ԵԱԳԽ պետությունների ՊՆ նախարարների հանդիպման արդյունքներին ու ՆԱՏՕ-ի շրջանակներում առաջիկայում կազմակերպվելիք միջոցառումներին:

Դեսպանի խնդրանքով նախարար Օսկանյանը ներկայացրեց Լեռնային Ղարաբաղի հակամարտության խաղաղ կարգավորման վերջին զարգացումները: