Բուենոս Այրեսի «Արտեկլասիկա» կերպարվեստի ամենամյա ցուցահանդեսի շրջանակում, որտեղ ներկայացվում են արգենտինացի լավագույն նկարիչների աշխատանքներն, այս տարի հատուկ տեղ էր հատկացված «Հետսովետական կերպարվեստը» խորագիրը կրող տաղավարին, որտեղ ներկայացված էին` Հայաստանի, Ռուսաստանի, Ուկրաինայի, Բելառուսի եւ Վրաստանի ժամանակակից նկարիչների ստեղծագործությունները: Քանի որ ցուցադրվող շուրջ 45 կտավներից մեծ մասի հեղինակներն ազգությամբ հայեր էին, ցուցահանդեսի կազմակերպիչների խնդրանքով, Արգենտինայում ՀՀ դեսպանությունն իր հովանավորությունն ու աջակցությունն էր տրամադրել հատուկ տաղավարի բացման եւ ձեւավորման համար:

Տաղավարի շնորհանդեսը կայացավ մայիսի 8-ին: Շուրջ 100 հատուկ հրավիրյալների շարքում էին պետական կառույցների բարձրաստիճան պաշտոնյաներ, օրենսդիրներ, օտարերկրյա դեսպաններ, համայնքային կառույցների ղեկավարներ, լրագրողներ: Ցուցադրվող աշխատանքներն արժանացան արգենտինացի արվեստագետների մեծ ուշադրությանն ու հավանությանը: Տաղավարն այցելեցին նաեւ հազարավոր արգենտինացի արվեստասերներ, այդ թվում` արգենտինահայեր:

Բուենոս Այրեսում ՀՀ դեսպանությունը ցուցահանդեսի սրահում շնորհանդեսից հետո տվեց ընդունելություն:

Ցուցահանդեսի անցկացման առիթով թողարկված մեծ կատալոգի առաջին էջերին զետեղված է Արգենտինայում ՀՀ դեսպան Վլադիմիր Կարմիրշալյանի ողջույնի խոսքը: