Ավստրիայում աշխատանքային այցով գտնվող ՀՀ ԱԳ նախարար Վարդան Օսկանյանը մասնակցեց ԵԱՀԿ մշտական խորհրդի նիստին:

Իր ելույթում նախարար Օսկանյանը խոսեց ԵԱՀԿ բարեփոխումների, ԵԱՀԿ երեւանյան գրասենյակի գործունեության, Հայաստանում խորհրդարանական ընտրությունների, հայ-թուրքական հարաբերությունների, ինչպես նաեւ` Լեռնային Ղարաբաղի խաղաղ գործընթացի ներկա փուլի մասին:

Նախարարի ելույթին հաջորդեցին ԵԱՀԿ անդամ պետությունների դեսպանների մեկնաբանություններն ու հարցերը:

Օրվա առաջին կեսին ՀՀ ԱԳ նախարարն այցելեց Ավստրիայի խորհրդարան, ուր տեղի ունեցավ հանդիպում խորհրդարանի արտաքին հարաբերությունների հանձնաժողովի նախագահ Կասպար Այնեմի հետ:

Կողմերը զրուցեցին Հայաստանում խորհրդարանական ընտրությունների մասին, կարեւորելով դրանց միջազգային չափանիշներին համապատասխան անցկացումը: Նախարարը ընդգծեց, որ առաջիկա ընտրությունները լրջագույն մարտահրավեր են Հայաստանի համար` ազատ եւ արդար ընտրությունների միջոցով փաստելու ժողովրդավարության եւ իրավունքի գերիշխանության շուրջ մեր համախմբման նպատակամղվածությունը:

Անդրադառնալով երկկողմ համագործակցության հարցերին, կողմերը կարեւորեցին ընտրություններից հետո երկու երկրների խորհրդարանականների միջեւ համագործակցության հաստատումը:

Պարոն Այնեմի խնդրանքով նախարարը ներկայացրեց ՀՀ արտաքին քաղաքականության առաջնայնությունները, հարեւանների հետ հարաբերությունները, Լեռնային Ղարաբաղի հակամարտության կարգավորման հեռանկարները: