Ս.թ. մարտի 2-ին ՀՀ ԱԳ նախարարի տեղակալ Արմեն Բայբուրդյանն ընդունեց երկօրյա այցով Հայաստանում գտնվող Հարավային Կովկասում ԵՄ hատուկ ներկայացուցիչ Փիթեր Սեմնեբիին (Peter Semneby):



Հանդիպման ընթացքում կողմերը քննարկեցին ԵՄ-Հայաստան հարաբերությունները` անդրադառնալով Եվրոպական հարեւանության քաղաքականության շրջանակում ստորագրված գործողությունների ծրագրի իրականացմանը: ՀՀ փոխարտգործնախարարը տեղեկացրեց, որ գործողությունների ծրագրի իրականացվելիք միջոցառումների ցանկը գտնվում է մշակման փուլում եւ մոտ ժամանակներս կներկայացվի եւրոպական կողմին:

Զրուցակիցները նաեւ անդրադարձան Հայաստանում գալիք խորհրդարանական ընտրություններին, կարեւորելով դրա միջազգային չափանիշներին համապատասխան անցկացումը: Պրն. Սեմնեբին ընդգծեց, որ ընտրությունների պատշաճ անցկացումով Հայաստանը համապատասխան ուղերձ կհղի ԵՄ-ին` երկկողմ հարաբերությունների խորացման առումով:

Կողմերը մտքեր փոխանակեցին Լեռնային Ղարաբաղի հակամարտության բանակցությունների վերջին զարգացումների վերաբերյալ:

Հանդիպմանը մասնակցում էր ԵՄ նախագահող Գերմանիայի դեսպան Հայկե Փայչը (Heike Peitsch):