Վ.Օսկանյան - Ինձ համար մեծ պատիվ է այսօր արտգործնախարարին ողջունել Երեւանում. սա նրա առաջին այցն է Հայաստան: Այցը նաեւ զուգադիպում է Հայաստանի եւ Լեհաստանի միջեւ դիվանագիտական հարաբերություններ հաստատելու 15-ամյակին, նաեւ խորհրդանշական նշանակություն ունի: Հայաստան-Լեհաստան հարաբերությունները բավականին զարգացել են այս 15 տարվա ընթացքում: Տեղի է ունեցել շատ խորը քաղաքական երկխոսություն մեր երկրների միջեւ: Կա նաեւ ռազմական գործակցություն` մեր կոնտինգենտը Իրաքում Լեհաստանի հետ ռազմական համագործակցության մեջ է: Տնտեսական գործակցությունը երկու երկրների միջեւ դեռեւս այդքան ակտիվ չէ, բայց արդեն շրջանառության մեջ են դրվել համաձայնագրերի նախագծեր, եւ մենք հուսով ենք, որ լուրջ առաջընթաց կգրանցենք այդ ուղղությամբ, հատկապես հիմա, երբ Հայաստանը միացել է ԵՄ նոր հարեւանության ծրագրին` ստորագրելով գործողության ծրագիրը: Այդ կոնտեքստում մենք տեսնում ենք նոր առիթներ, որ նաեւ մեր երկկողմ հարաբերությունները առաջ տանենք:

Այսօր շատ հետաքրքրական եւ խորը բանակցություններ ենք ունեցել, մեր օրակարգը ծավալուն էր: Խոսել ենք մեր երկկողմ հարաբերությունների մասին, եվրոպական քաղաքականության մասին, քննարկել ենք, թե Լեհաստանը ինչպես է կարող իր փորձով օգտակար լինել մեզ եվրաինտեգրման գործընթացում: Խոսել ենք նաեւ տարածաշրջանային հարցերի մասին եւ ես նախարարին ներկայացրել եմ Լեռնային Ղարաբաղի խաղաղ գործընթացը, այն փաստաթղթի բովանդակությունը, որի շուրջ մենք հիմա բանակցում ենք, խոսել եմ հեռանկարների մասին: Շոշափել ենք նաեւ մեր հարեւանների, հատկապես Թուրքիայի հետ մեր հարաբերությունները: Լեհաստանը ուզում է, որ հայ-թուրքական հարաբերությունները կանոնակարգվեն եւ տարբեր առիթներով միշտ փորձեր է կատարել այս ուղղությամբ: Ես նախարարին տեղյակ պահեցի, թե այսօր ինչ վիճակում են գտնվում այդ հարաբերությունները եւ Լեհաստանը ինչպես կարող է օգտակար լինել այդ հարցում: Իմ խնդրանքով նախարարը մեզ տեղեկացրեց հարեւանների հետ իրենց հարաբերությունների մասին:

Անշուշտ, էներգետիկ հարցերը նույնպես քննարկվեցին: Երկու երկրների համար էներգետիկ աղբյուրների դիվերսիֆիկացիան կարեւոր նշանակություն ունի:

Ընդհանրապես շատ օգտակար, արդյունավետ խոսակցություն էր եւ հուսով եմ, որ նախարարի այցը լավ խթան կլինի երկու բարեկամ ընկերների հարաբերությունները խորացնելու ուղղությամբ: Տիկին նախարար բարով եք եկել եւ խնդրեմ, խոսքը փոխանցում եմ Ձեզ:

Ա. Ֆոտիգա - Շնորհակալություն, պարոն նախարար, տիկնայք եւ պարոնայք: Շատ ավելի լավ եղավ, որ Լեհաստանի արտգործնախարարը այսօր` փետրվարի 26-ին, այստեղ` Երեւանում լինի: Այսօր Լեհաստանի եւ Հայաստանի միջեւ դիվանագիտական հարաբերություններ հաստատելու 15-ամյակն է: Ես ուրախ եմ, որ այստեղ եմ, որ կարողացանք մանրամասնորեն քննարկել երկկողմ հարաբերությունները, ինչպես նաեւ բազմակողմ հարցեր: Մենք ողջունում ենք Հայաստանի մասնակցությունը ԵՄ նոր հարեւանության ծրագրին: Լեհաստանը ԵՄ նոր անդամ է, մենք ԵՄ-ին ինտեգրման որոշակի փորձ ունենք, ինչպես նաեւ ունենք փայլուն պատմական կապեր Հայաստանի հետ: Լեհաստանը կարող է օգտակար լինել Հայաստանին իր եվրոպական քաղաքականության մեջ: Մենք նպատակ ունենք ավելի ակտիվ լինել այս ուղղությամբ: Մի քանի րոպե առաջ մենք համապատասխան հուշագիր ենք ստորագրել եւ մեր առաջիկա հանդիպման ընթացքում կխոսենք կոնկրետ այն միջոցների մասին, որոնցով կարողանանք օժանդակել Հայաստանին եվրոպական նկրտումների իրագործման գործերում:

Լեհաստանը թեեւ շատ դաժան պատմական փորձ է ունեցել, բայց այսօր մենք օգտվում ենք միջազգային համայնքում մեր մասնակցության միջոցով, եւ դրա համար ողջունում ենք, որ կարող ենք նաեւ Հայաստան-ՆԱՏՕ անհատական գործողությունների ծրագրի շրջանակում ծավալել համագործակցություն: Մենք ողջունում ենք մեր գործակցությունը Իրաքում: Դա մեզ ընդհանուր փորձ է տալիս եւ օգտակար է, եւ ուզում ենք բարեկամ պետության հետ երկկողմ գործակցություն զարգացնել նաեւ այլ ոլորտներում` հասարակության կոնտակտների, առեւտրական եւ մշակութային կապերի: Մենք պատրաստ ենք մշակել եւ իրականացնել նաեւ երկկողմ ծրագրեր. դրանք պետք է քննարկվեն ոչ միայն բարձր քաղաքական, այլ նաեւ փորձագիտական մակարդակով: Մենք կարող ենք բազմաթիվ փորձագետներ հայթայթել մեր անդամակցության այս երկար գործընթացին տեղյակ. 12 տարի տեւեց, մինչեւ մենք դարձանք Եվրամիության անդամ, բայց այդ տարիների ընթացքում կարողացել ենք այնպիսի ձեւով մեզ դրսեւորել, որ պատշաճ, ադեկվատ ուժ եւ կարգավիճակ ունենանք ԵՄ կառույցներում եւ, անշուշտ, կարողանանք այդ ուժն ու կարգավիճակը օգտագործել այսօրվա ԵՄ կառույցներում: Երբեմն դա դժվար է, բայց մենք կարողացել ենք հետապնդել մեր ընհանուր շահերը Եվրոպայում: Ինչպես նշեց նախարարը, մեծագույն հարց է էներգետիկ անվտանգության հարցը եւ դրա համար մենք շահագրգռված ենք, որ լինի սուվերեն Կովկաս, խաղաղ Կովկաս եւ շատ ավելի բարձր մակարդակի գործակցություն:

Հարց. «Ազատություն» ռադիոկայան - Տիկին նախարարը ողջունեց Իրաքում Հայաստանի եւ Լեհաստանի համագործակցությունը: Ըստ որոշ տեղեկությունների, մինչեւ տարվա վերջ Լեհաստանը պատրաստվում է դուրս հանել իր զորախումբը Իրաքից, այդ դեպքում հայկական զորախմբի ճակատագիրն ինչպիսի՞ն կլինի:

Ա. Ֆոտիգա - Ես կարող եմ ասել, որ ըստ Լեհաստանի սահամանադրական համակարգի, որոշումը Լեհաստանի նախագահինն է: Իհարկե, այդ որոշումը կկայացվի կառավարության խնդրանքով, սակայն դեռ որեւէ որոշում չկա, եւ մենք պատրաստ ենք կոնստրուկտիվ մաս կազմել Իրաքի կայունացման պրոցեսներում: Դրա համար այսպիսի հարցերը միշտ խորհրդակցաբար ենք որոշում մեր գործընկերների հետ` չցանկանալով որեւէ ձեւով վնասել Իրաքի անվտանգությանը:

Վ. Օսկանյան - Ես մեր հանդիպման ընթացքում այդ հարցը բարձրացրել եմ, նախարարն ինձ նույն պատասխանն է տվել, եթե որոշում լինի, մեզ, իհարկե, տեղյակ կպահեն, բայց այս պահի դրությամբ այդպիսի խնդիր, կարծես թե, չկա:

Հարց. - Եվ եթե կարելի է երկրորդ հարցը: Լեհաստանն ինչո՞վ եւ ինչպե՞ս կարող է օգտակար լինել Հայաստանի ինտեգրմանը Եվրամիությանը:

Վ. Օսկանյան - Այսօր մենք հուշագիր ենք ստորագրել Հայաստան-Եվրամիություն, եվրոպական ինտեգրման ուղղությամբ Լեհաստանի հետ համագործակցության վերաբերյալ: Քիչ առաջ նշեցի, որ Լեհաստանն այդ ճանապարհն անցել է, բավական լավ փորձ է կուտակել եւ կարծում եմ, որ մենք կարող ենք այդ փորձից օգտվել` հատկապես հաշվի առնելով սովետական շրջանի քաղաքական, տնտեսական նմանությունները: Այսինքն, այն ռեֆորմի ճանապարհը, որ Լեհաստանն է անցել, մեզ համար շատ օգտակար է, եվրոպական կառույցների հետ ինտեգրացիոն գործընթացների մասով օգտակար է: Ես համոզված եմ, որ մեր ստորագրած հուշագիրն, իսկապես, նպաստելու է մեր համագործակցությունը խորացմանը հենց այդ ոլորտում:

Ա. Ֆոտիգա - Ես նույն կարծիքին եմ:

Հարց. «ՄԻՐ » հեռուստաընկերություն - Հայաստանը հանդիսանում է ՀԱՊԿ ակտիվ անդամ, դրա հետ կապված ինձ հետաքրքրում է ՆԱՏՕ-ի հրթիռների տեղակայման հարցը Լեհաստանի տարածքում:

Ա. Ֆոտիգա - Մենք չենք խոսել Լեհաստանի տարածքում ՆԱՏՕ-ի հակահռթիռային կայան տեղադրելու մասին: Այդպիսի առաջարկ ներկայացվել է ամերիկացիների կողմից Լեհաստանին, որ նման կայան տեղադրվի: Սա պետք է դեռ քննարկվի Լեհաստանի կառավարության, իշխանությունների կողմից, նախագահական ապարատի կողմից: Մենք պատրաստ ենք քննարկել ցանկացած անվտանգության հարց, ներառյալ նման հարցը, բայց որոշում առայժմ չի կայացվել: Որեւէ ժամկետ չկա այս հարցի կապակցությամբ:

Հարց. Հանրային Ռադիո - Մեկական հարց նախարարներին: Նախ, Լեհաստանի ԱԳ նախարարից ուզում էի հարցնել. վերջերս եղան հաղորդագրութուններ, որ Լեհաստանը պատրաստվում է ավելի լուրջ ներդրում ունենալ հայ-թուրքական հարաբերությունների բնականոնացման հարցում: Ի՞նչ կասեք այդ մասին: Եվ պարոն Օսկանյան, Ձեզ հարց. ինչպե՞ս եք վերաբերվում, որպես նախարար, որպես նախկին սփյուռքահայ, սփյուռքահայերին ընտրելու իրավունք տալու այդ պնդումներին, որն անում է ՀՅԴ-ն: Շնորհակալություն:

Ա. Ֆոտիգա - Նախ, ես կասեի, որ Լեհաստանը արդեն գործոն է տարբեր ոլորտներում: Մենք ակտիվորեն օժանդակում ենք քննարկումներին Մինսկի խմբի շրջանակներում: Տարիների ընթացքում մենք օժանդակում ենք եւ շատ կարեւոր է մեզ համար, որ կառուցողական գործոն լինենք տարբեր ոլորտներում` այդ թվում, այսպես կոչված, սառեցված հակամարտություններում: Մենք պատրաստ ենք այդ անել մեր գործընկերների խնդրանքով, չեինք ուզենա ինքնագլուխ մտնել նման զգայուն պրոցեսների մեջ: Մենք հետեւում ենք այս գործընթացներին եւ կցանկանայինք դրական արդյունքներ տեսնել:

Վ. Օսկանյան - Ինչ վերաբերում է երկքաղաքացիության հարցին, եթե քաղաքացիություն է շնորհվում, պետք է տալ նաեւ բոլոր իրավունքները եւ պահանջել նաեւ քաղաքացիության պարտավորություններ. երկքաղաքացի կլինի անձը, թե մի քաղաքացիություն կունենա: Ես կողմ եմ, որ Հայաստանի բոլոր քաղաքացիները, անկախ նրանից երկքաղաքացի են, թե միայն Հայաստանի քաղաքացի, քվեարկելու իրավունք ունենան մեր օրենքի շրջանակում: Պարտավորություններն ու իրավունքներն ամբողջությամբ պետք է դրվեն, իհարկե, որոշ բացառություններով. այն, ինչ-որ սահմանափակվում է սահմանադրությամբ` նախագահ ընտվելը կամ Ազգային ժողովի պատգամավոր, այդ բոլորը հասկանալի է, դրանք կարգավորվում են սահմանադրությամբ, բայց ինչ վերաբերում է քաղաքացու իրավունքներին, կարծում եմ` երկքաղաքացիություն տալով` պետք չէ նոր կատեգորիաներ ստեղծենք` մեկին առավելություններ, մյուսին նվազ հնարավորություններ ընձեռելով: Բոլորի համար, կարծում եմ, եւ իրավունքների, ե'ւ պարտավորությունների առումով հավասար դաշտ պետք է կարողանանք ստեղծել մեր օրենքի եւ սահմանադրության շրջանակներում:

Հարց. Հանրային Ռադիո - Հարցս վերաբերում էր հայ-թուրքական հարաբերություններին, մասնավորապես վերջերս, երբ Լեհաստանի խորհրդարանի մարշալն էր այստեղ, լրատվամիջոցները հաղորդագրություն տարածեցին, որ Լեհաստանը կարող է ներկայացնել Թուրքիայի շահերը: Ես ուզում էի իմանալ` ի՞նչ զարգացումներ կան:

Ա. Ֆոտիգա - Անցյալում Լեհաստանը ուներ նման նախաձեռնություն` միջնորդ լինելու երկու կողմերի միջեւ, բայց ոչ ներկայացնելու այս կամ այն կողմը: Մենք պատմականորեն լավ կապեր ունենք թե Հայաստանի, թե? Թուրքիայի հասարակությունների հետ: Մենք ունեցել ենք հարաբերությունների լավ փորձ Թուրքիայի հետ: Թուրքիան Լեհաստանի անկախությունը ճանաչեց ամենադժվար պայմաններում, շատ տարիներ առաջ: Լավ փորձ ունենք նաեւ Հայաստանի հետ: Դա բավական յուրահատուկ իրավիճակ է, բայց մենք պատրաստ ենք այսպիսի ծառայություն մատուցել միայն, երբ երկու կողմերը դա խնդրեն կամ պահանջեն: Մեր նախարարներից մեկն անցյալում, ճիշտ է, այդպիսի բան ասել է, բայց երկու կողմերը պետք է նման պահանջ ներկայացնեն:

Հարց. «Հայստանի Հանրապետություն» - Սկզբում հարցը, կարծես թե, հնչեց, բայց ես ուզում եմ կոնկրետացնել: Եվրամիության հետ Հայաստանի գործողությունների ծրագիրը կնքելուց հետո դուք ասացիք, որ հունվար-փետրվար ամիսներին պետք է նաեւ երկկողմանի պայմանավորվածություններ ձեռք բերվեն Եվրամիության անդամ պետությունների եւ Հայաստանի միջեւ այդ ծրագրի իրագործման համար: Ուզում եմ իմանալ, արդյոք այս հուշագիրը ենթադրու՞մ էր հենց այդ շրջանակում Հայաստան-Լեհաստան երկկողմանի համագործակցություն եւ ծրագրի մասնակի իրագործում Եվրամիության հետ, եւ Լեհաստանն այս հարցում ի՞նչ ներդրում պետք է ունենա:

Վ. Օսկանյան - Այսօր Հայաստանը երկու տարբեր գործընթացներ է տանում` մեկը, որ մեր ԵՄ-ի հետ ամբողջական գործողությունների ծրագրից առանձանցնում է 2007-2008 թթ. համար մեր առաջնայնությունները: Մենք այս պահին այդ պրոցեսի մեջ ենք գտնվում, եւ կարծում եմ, որ ամենաուշը մարտի կեսին արդեն մեր առաջնայնությունները կներկայացնենք Եվրոպական հանձնաժողովին: Երկրորդ գործընթացը նման երկկողմ հանդիպումների արդյունքում այդ ծրագրի շրջանակում համագործակցության ոլորտներ գտնելու փորձն է: Այս գործընթացը արվում է երկկողմ առումով Եվրամիության բոլոր անդամ երկրների հետ: Գերմանիայի ԱԳ նախարարն էր այստեղ անցած շաբաթ, նույն հարցը նրա հետ է քննարկվել, այսօր տիկին Ֆոտիգայի հետ մենք քննարկել ենք նաեւ` ինչպիսի համագործակցություն կարող է լինի. իրոք, հուշագիրը, որ այսօր ստորագրվեց, միանշանակորեն նպաստելու է եւ երկկողմ ծրագրերի իրականացման առումով, ե?ւ Եվրամիության հետ մեր բազմակողմ հարաբերությունների առավել խորացման առումով:

Ա. Ֆոտիգա - Ավելացնեմ այստեղ, բնականաբար, Եվրամիության որեւէ անդամ երկրի համար համագործակցության ծրագիրը եւ գործողությունների ծրագիրը բավարար օրինականության հիմք են ներկայացնում համագործակցության համար, սակայն, պայմանագրեր կամ հուշագրեր ստորագրել, որպեսզի հնարավոր լինի նման քաղաքական գործունեություն վարել միասին նախընտրած ոլորտներում:

Հարց. Ա1+ հ/ը - Ես երեք հարց ունեմ, երեքն էլ` Լեհաստանի արտգործնախարարին: Հարց առաջին. ես վերջերս առիթ եմ ունեցել լինել Լեհաստանում եւ ընդամենը մի օրվա ընթացքում ուժային նախարարները հրաժարականներ տվեցին եւ բոլոր լրատվամիջոցները, կարծես թե, լռում էին, որեւէ կերպ չէին գնահատում դա, իսկ ոմանք էլ բացատրում էին, որ Կաչինսկիների հետ շփվելը դարձել է անտանելի, ներողություն եմ խնդրում, եթե դա այդպես չէ, ուղղակի ուզում եմ, որպեսզի դուք, որպես ԱԳ նախարար, մեկնաբանեք դա:

Ա. Ֆոտիգա - Կարող եմ ձեզ վստահեցնել , որ բավական տանելի է այս` Կաչինսկիների, կառավարության անդամ լինելը եւ ծառայելը, նաեւ նրա եղբորը` նախագահին ծառայելը, երկուսն էլ բացառիկ քաղաքական գործիչներ են, ծառայում են Լեհաստանի շահերին, թե ներքին, եւ թե արտաքին ասպարեզում, եւ ինձ պատիվ է նրանց օժանդակելը:

Հարց. - Շատ շնորհակալ եմ: Վերջերս Լեհաստանի կառավարության որոշման համաձայն գրանցվել է նոր կրոնական համայնք, որը վերաբերում է մեր առաքելական եկեղեցուն: Դա ի՞նչ կտա այնտեղ ապրող մեր հայ համայնքին: Շնորհակալություն:

Ա. Ֆոտիգա - Համայնքի գրանցումը, կրոնական իրավունքների ճանաչումը միայն ողջունելի է, եւ թերեւս նախարարը մեկնաբանի այդ: Ինձ թվում է` դա ազդակ է, որ հայ համայնքի քաղաքացիները ապահով պետք է զգան իրենց Լեհաստանում:

Հարց. «Ռեգնում» գործակալություն - Ես հարցս ուղղում եմ պանի Ֆոտիգային: Պանի Ֆոտիգա, հարցս նորից վերաբերում է ՆԱՏՕ-ի բազայի տեղակայամանը Լեհաստանում, ինչը խիստ պատասխանի է արժանացել Ռուսաստանի կողմից, որը նաեւ ասել է, որ կարող է իր հրթիռներն ուղղել Եվրոպայի վրա եւ նույնիսկ վերադառնալ միջին հեռավորության հրթիռների արտադրությանը: Չե՞ք կարծում արդյոք, որ դա կարող է ուժերի դիսբալանսի բերել Եվրոպայում եւ ընդհանրապես աշխարհում եւ ուղղակի խարխլել անվտանգությունը:

Ա. Ֆոտիգա - Կարող եմ նշել, որ մինչ մենք խոսում ենք մեր ամերիկյան գործընկերների հետ, մենք բոլոր հարցերը նկատի կունենանք եւ կբալանսավորենք բոլոր գործոնները: Մեր գերակա խնդիրը` Լեհաստանի անվտանգությունը հնարավորինս օպտիմալ մակարդակի բերելն է, ինչպես նաեւ Եվրոպայի եւ աշխարհի անվտանգությունը: Այդ է մեր գերակա խնդիրը, մտահոգությունը, երբ մենք քննարկում ենք այս հարցերը: Մենք քննարկման դեռ սկզբնական փուլերում ենք գտնվում, ավելի ճիշտ, նույնիսկ չենք էլ սկսել քննարկել, դեռ գնահատում ենք իրավիճակը, թե օրենսդրական, թե տեխնիկական հարցեր ունենք, դեռ շուտ է այս հարցերը քննարկել: Տարիների ընթացքում կային նման խոսակցություններ ամերիկացիների եւ ռուսների միջեւ այդօրինակ հարցերի վերաբերյալ, եւ երբեմն քաղաքական հայտարարությունները քաղաքական իրականությունից հեռու են:

Հարց. «Արմենպրես» գործակալություն - Վերջին հարցը, պարոն Օսկանյան, ձեզ ուղղեմ: Հստակեցվե՞լ են արդեն ժամկետները Ադրբեջանի ԱԳ նախարարի հետ հաջորդ հանդիպման եւ կներկայացնե՞ք Լեռնային Ղարաբաղի բանակցային գործընթացը ո՞ր հանգրվանին է հասել:

Վ. Օսկանյան - Հանգրվանի մասին շատ բան չեմ կարող ասել, կարծում եմ, որ նորմալ հունով գնում է: Հանդիպում նախարարների միջեւ կլինի, թվականը դեռեւս չի կոնկրետացվել, բայց կարծում եմ, որ մարտի կեսերին, նախնական այդպիսի փորձ է արվում եվրոպական մի մայրաքաղաքում` կախված նաեւ նախարարների ծրագրից: Այնպես որ, հենց որ այդ թվականը հստակեցվի, դրա մասին կլինի նախարարության հայտարարությունը:

Հարց. «Հայկական ժամանակ» օրաթերթ - Ես ուզում եմ նորից վերադառնալ հայ-թուրքական հարաբերություններում Լեհաստանի միջնորդի դերին: Որքան հասկացանք, պարոն Օսկանյան, ձեր ներածական խոսքից, դուք խոսել եք այդ մասին եւ Հայաստանը կողմ է, որպեսզի Լեհաստանը այդ դերը կատարի: Արդյոք դա այդպե՞ս է, ճիշտ հասկացվե՞ց, եւ արդյոք թուրքական կողմը նման հարցով չի՞ դիմել Լեհաստանի նախագահին: Սա առաջին հարցը:

Վ.Օսկանյան - Լավ, ես նախ ասեմ, որ մեր քննարկումների ընթացքում հայ-թուրքական հարաբերությունները մի քիչ այլ կտրվածքով են եղել: Ես ուղղակի նախարարին տեղյակ եմ պահել, թե ինչպիսի իրավիճակում են գտնվում մեր հարաբերությունները եւ բացատրել եմ Հայաստանի քաղաքականությունը այդ հարցում, որ մենք նախապայմաններ չունենք: Լեհական առաջարկության վրա չենք կենտրոնացել: Այդ առաջարկության մասին նախարարն արդեն ասաց, որ նրանք պատրաստ կլինեն նման բան իրականացնել, եթե երկու կողմերը իրենց համաձայնությունը տան: Առաջարկությունը, իհարկե, ողջունելի է, հետաքրքրական է, միշտ էլ օրակարգում է, քննարկվում է: Հարմար պահի, ես կարծում եմ, որ հնարավոր կլինի իրականացնել: Ուղղակի նման քայլերը ինքնանպատակ պետք չէ, որ լինեն: Իսկապես, բոլոր կողմերը պետք է զգան, որ այդ քայլն անելով` դրական արդյունքներ պետք է լինեն հարաբերություններում, այլապես ինքնանպատակ կլինի եւ արդյունք չի տա: Այնպես որ, մենք ողջունում ենք Լեհաստանի պատրաստակամությունը` նպաստելու հայ-թուրքական հարաբերությունների նորմալացմանը: Երբ որ ժամանակը գա, կարիքը զգացվի, ես անպայման համոզված եմ, որ փոխադարձ խնդրանք կլինի Լեհաստանին` իրենց աջակցությունը բերելու:

Ա.Ֆոտիգա - Միայն կարող եմ հավաստել այս հաստատումը:

Հարց. - Եվ երկրորդ հարցը տիկին Ֆոտիգային է ուղղված: Մինչ այս տարածաշրջանային այցը կատարելը, դուք ադրբեջանական Թրենդ գործակալությանը տված հարցազրույցում ասել էիք, որ սառեցված հակամարտությունները Հարավային Կովկասում պետք է լուծվեն գոյություն ունեցող պետությունների տարածքային ամբողջականության սահմաններում: Դա, արդյոք, նշանակու՞մ է, որ Լեհաստանը Ղարաբաղի հարցում պաշտպանում է ադրբեջանական դիրքորոշումը: Շնորհակալություն:

Ա.Ֆոտիգա - Ես պատրաստված եւ վարժված քաղաքական գործիչներից եմ: Մամուլը մեզ հետ մի քիչ ոչ փափուկ ձեւով է վարվում, այսինքն երբեմն իմ բառերը փոխվում են եւ օգտագործվում են ոչ իրենց ձեւով: Ես պարզապես ուզում էի ասել, որ կուզեի տեսնել հաջող, խաղաղության բանակցությունների գործընթաց հայերի եւ Ադրբեջանի միջեւ: Մենք ողջունում ենք երկխոսության ներկա փուլը եւ կուզեինք տեսնել այս կոնֆլիկտի համապատասխան ճիշտ լուծում, որովհետեւ կոնֆլիկտը դա տարածաշրջանային անվտանգության պատ է, եւ բոլորը, Մինսկի խումբը ներառյալ, պետք է աշխատեն այս պրոցեսի վրա, որպեսզի առավելագույնս արագ եւ ճիշտ ձեւով լուծվի, որպեսզի Կովկասի օգտին լինի լուծումը:

Վերջ: