Ս.թ. փետրվարի 24-ին ՀՀ ԱԳ նախարար Վարդան Օսկանյանն ընդունեց եռօրյա այցով Հայաստանում գտնվող Ֆրանսիայի տարածքի բարեկարգման նախարար, Մերձծովային Ալպերի գլխավոր խորհրդի նախագահ Քրիստիան Էստրոզիի (Cristian Estrozi) գլխավորած պատվիրակությանը:

Նախարար Օսկանյանը ողջունեց պարոն Էստրոզիին` Հայաստանում գտնվելու կապակցությամբ, հույս հայտնելով, որ այցը արդյունավետ կլինի երկու կողմերի համար: Այնուհետեւ նա անդրադարձավ Ֆրանսիայում Հայաստանի տարվա անցկացմանը, ինչի կապակցությամբ ընդգծվեց ֆրանսիական կողմի ներդրումը միջոցառումների լավագույնս կազմակերպման համար:

Ֆրանսիայի նախարարը համառոտ ներկայացրեց իր այցի նպատակները: Նախարարը նաեւ խոսեց ֆրանսիական հանրությանը Հայաստանի բազմադարյա մշակութային արժեքների ներկայացման կարեւորության մասին, ինչը, ըստ նրա, նպաստում է հայ ժողովրդի մասին առավել խոր պատկերացում կազմելուն:

Հյուրի խնդրանքով, ՀՀ արտգործնախարարը ներկայացրեց Հայաստանի տնտեսական վիճակը, ինչպես նաեւ էներգետիկ ոլորտում ռեսուրսների դիվերսիֆիկացիայի ուղղությամբ տարվող աշխատանքները:

Զրուցակիցներն ընդհանուր գծերով անդրադարձան արտաքին քաղաքական խնդիրներին, տարածաշրջանային հարցերին: