Հրանտ Դինքի սպանության կապակցությամբ Հայաստանի դեսպանության հետ համագործակցությամբ շվեյցարահայ համայնքի կողմից կազմակերպվել են մի շարք միջոցառումներ՝ ոճրի հանդեպ շվեյցարական հասարակական եւ քաղաքական շրջանակների ուշադրությունը հրավիրելու նպատակով:

Հունվարի 26-ին Շվեյցարիա-Հայաստան ընկերակցության կազմակերպության կողմից կազմակերպվել է քայլարշավ եւ ցույց Բեռնում Թուրքիայի դեսպանության առջեւ, որին մասնակցել է մոտ 150 հոգի: Ցույցին մասնակցել են Շվեյցարիայի Ազգային խորհրդի պատգամավորներ. ելույթ են ունեցել պատգամավորներ Հանս-Յորգ Ֆերը, Րութ Գաբի Վերմոթ-Մանգոլդը, Թերեզ Ֆրոշը, նաեւ «Լրագրողներ առանց սահմանի» կազմակերպության շվեյցարական մասնաճյուղի գլխավոր քարտուղար Թերեզ Օբրեխտը: Թուրքիայի դեսպանությանն է հանձնվել քայլարշավի մասնակիցների կոչը թուրքական կառավարությանը, դեսպանությունը ցույցի մասնակիցներին ներկայացնող պատվիրակությանը չի ընդունել:

Շվեյցարիա-Հայաստան բարեկամության պատգամավորական խմբի եւ Շվեյցարիա-Հայաստան ընկերակցություն կազմակերպության անունից նամակ է հղվել ՇՀ ԱԳ նախարարությանը՝ խնդրելով արտահայտել շվեյցարական պաշտոնական դիրքորոշումր սպանության կապակցությամբ: Հունվարի 31-ին Շվեյցարիայի ԱԳ 1-ին քաղաքական տնօրինության ղեկավար դեսպան Ժան-Ժակ դե Դարդելը տրամադրել է պատասխան տեքստ:

Հունվարի 28-ին Ժնեւի Ս. Հակոբ եկեղեցում կայացել է սգո եւ հիշատակի պատարագ ու արարողություն, որի ընթացքում ելույթ են ունեցել Շվեյցարիայում Հայաստանի դեսպանը, եկեղեցական առաջնորդ Աբել քահանա Մանուկյանը եւ Շվեյցարիայի հայերի միության նախագահ Վ.Գաբրաշը: