Ս. թ. հունվարի 15-ին ՀՀ ԱԳ նախարար Վարդան Օսկանյանն ընդունեց երկօրյա այցով Հայաստանում գտնվող ԵԱՀԿ Ժողովրդավարական հաստատությունների եւ մարդու իրավունքների գրասենյակի տնօրեն (ԺՀՄԻԳ), դեսպան Քրիստիան Շտրոհալին:

Ողջունելով հյուրին, նախարարը նշեց որ, Հայաստանի իշխանությունները դրական են գնահատում ԵԱՀԿ ԺՀՄԻԳ գործունեությունը Հայաստանում ժողովրդավարության զարգացման գործընթացում եւ կարեւորեց ընտրությունների նախաշեմին պրն Շտրոհալի այցը:

Դեսպան Շտրոհալն ընդգծեց, որ այցի նպատակն է քննարկել ԵԱՀԿ ԺՀՄԻԳ ու Հայաստանի համագործակցութունը ու Հայաստանի առաջիկա խորհրդարանական ընտրությունների հետ կապված հարցերը:

Կարեւորելով ընտրությունների ազատ ու արդար անցկացումը, կողմերը անդրադարձան Հայաստանում ընտրական համակարգի կայացման գործընթացին` ընդգծելով ԵԱՀԿ դերը Հայաստանում ընտրական օրենսգրքի մշակման, ընտրական մարմինների վերապատրաստման ու նրանց փորձագիտական աջակցության ցուցաբերման հարցում:

Զրուցակիցները հույս հայտնեցին, որ Հայաստանը հաջողությամբ կշարունակի ներքին օրենսդրությունը ժամանակակից միջազգային չափանիշներին համապատասխանեցնելու գործընթացը, իրավական եւ դատական համակարգի բարեփոխումները, որոնք կնպաստեն մարդու իրավունքների պաշտպանության լիարժեք ապահովմանը:

ՏԵՂԵԿԱՆՔ. Քրիստիան Շտրոհալը ծնվել է 1951թ. Վիեննայում: Իրավաբանություն, տնտեսագիտություն, միջազգային հարաբերություններ է ուսումնասիրել Վիեննայի, Լոնդոնի եւ Ժնեւի բարձրագույն ուսումնական հաստատություններում: Դիվանագիտական կարիերան սկսել է 1975թ.: 2000-2003թթ. եղել է Ավստրիայի դեսպանը Լյուքսեմբուրգում, 2003 թվականից առ այսօր ԵԱՀԿ Ժողովրդավարական հաստատությունների եւ մարդու իրավունքների գրասենյակի տնօրենն է:Ամուսնացած է, ունի 3 զավակ: