Հայաստանը Եվրոպայի Խորհրդի լիիրավ անդամ է 2001թ. հունվարի 25-ից: 

Եվրոպայի խորհրդին Հայաստանի անդամակցության 20-ամյակի կապակցությամբ, տեսաուղերձներ են հղել ՀՀ ԱԳ նախարար Արա Այվազյանը և ԵԽ գլխավոր քարտուղար Մարիա Պեյչինովիչ Բուրիչը:

Եվրոպայի Խորհրդին Հայաստանի անդամակցության գործընթացը սկիզբ է առել 1995թ.: 1996թ. հունվարի 26-ին ՀՀ Ազգային ժողովը ԵԽ Խորհրդարանական Վեհաժողովում ստացել է hատուկ հրավիրյալի կարգավիճակ: 2000թ. նոյեմբերի 9-ին, Նախարարների կոմիտեի թիվ 2000/13 որոշման համաձայն, Հայաստանը ստացել է Եվրոպայի խորհրդի անդամ դառնալու հրավերը: 

2013թ. մայիսի 16-ին Հայաստանը վեց ամիս ժամկետով ստանձնեց Եվրոպայի Խորհրդի Նախարարների կոմիտեի նախագահությունը: /http://www.coe.int/en/web/portal/cm-chairmanship-armenia/

Հայաստանն ակտիվորեն ներգրավված է Եվրոպայի Խորհրդի կանոնադրական մարմինների, ինչպես նաև միջկառավարական համագործակցության փորձագիտական կոմիտեների աշխատանքներում և հանդես է գալիս կազմակերպության գործունեության և դերակատարության համար կարևոր նշանակություն ունեցող նախաձեռնություններով։ 

Եվրոպայի Խորհրդի Նախարարների կոմիտեում Հայաստանը ներկայացնում է ՀՀ արտաքին գործերի նախարարը: ԱԳ նախարարների մասնակցությամբ Նախարարների կոմիտեի նստաշրջանները 2006թ.-ից սկսած անց են կացվում տարեկան մեկ անգամ: 

Ստրասբուրգում գործում է ԵԽ-ում Հայաստանի Հանրապետության մշտական ներկայացուցչությունը: ԵԽ-ում ՀՀ մշտական ներկայացուցիչն է Արման Խաչատրյանը: 

Երևանում գործում է Եվրոպայի խորհրդի գրասենյակը, որն իրագործում է Հայաստան-Եվրոպայի խորհուրդ Գործողությունների ծրագիրը՝ օժանդակելով ՀՀ օրենսդրական և ինստիտուցիոնալ բարեփոխումներին։

ԵԽ Խորհրդարանական վեհաժողովում Հայաստանի պատվիրակությունը ձևավորվում է ՀՀ ԱԺ պատգամավորներից: Այն կազմված է չորս ներկայացուցչից և չորս փոխարինողից: /http://www.parliament.am/international.php?id=3&lang=arm#171/

Տեղական և տարածքային իշխանությունների կոնգրեսում Հայաստանի պատվիրակությունը ձևավորվում է ՀՀ տեղական ընտրովի մարմինների ներկայացուցիչներից: Այն կազմված է չորս հիմնական և չորս փոխարինող անդամներից: /http://www.coe.int/t/congress/whoswho/pays_fr.asp?id=34/ 

Եվրոպայի Խորհրդին անդամակցությունից ի վեր Հայաստանն անհրաժեշտ քայլեր է ձեռնարկել ԵԽ-ի առջև ստանձնած պարտավորությունների կատարման ուղղությամբ:

Վավերացվել են անդամակցությամբ նախատեսված բոլոր կոնվենցիաները: ԵԽ քարտուղարության և «Իրավունքի միջոցով ժողովրդավարության եվրոպական հանձնաժողովի» (Վենետիկի հանձնաժողով) փորձագիտական աջակցությամբ տարբեր տարիներին փոփոխվել են ՀՀ համապատասխան օրենսգրքերն ու օրենքները, այդ թվում՝ 2015թ. ՀՀ Սահմանադրության փոփոխությունը և դրանից բխող օրենսդրական բարեփոխումները։ 

Այսօր Հայաստան–Եվրոպայի Խորհուրդ համագործակցությունը ներառում է կազմակերպության իրավասությունների գրեթե ողջ շրջանակը` հաշվի առնելով Հայաստանի կառավարության առաջնահերթությունները, ինչպես նաև մոնիտորինգային մարմինների առաջարկություններն ու խորհրդատվությունը: 

Համագործակցության տարբեր մեխանիզմների շնորհիվ՝ իրականացվել են մեծ թվով ծրագրեր: Ընթացքի մեջ է ՀՀ/ԵԽ 2023-2026թթ. գործողությունների ծրագիրը: Այն արտացոլում է ՀՀ կառավարության 2021-2026թթ. ծրագրի գերակայությունները դատաիրավական և այլ ոլորտների բարեփոխումների իրականացման գործում։ Գործողությունների ծրագիրը կոչված է աջակցել Հայաստանին իրականացնելու ինչպես բարեփոխումների ազգային օրակարգը, այնպես էլ Եվրոպայի Խորհրդի անդամ-պետության իր կանոնադրական պարտավորությունները։

Հայաստանը ստորագրել և վավերացրել է Եվրոպայի խորհրդի 69 կոնվենցիա և  միացել 12 մասնակի համաձայնագրի: /http://www.conventions.coe.int//

Համագործակցություն Եվրոպայի խորհրդի մոնիտորինգային և փորձագիտական մարմինների հետ

Հայաստանը ստորագրել և վավերացրել է Եվրոպայի խորհրդի 70 կոնվենցիա և  միացել 12 մասնակի համաձայնագրի: /http://www.conventions.coe.int//

Մարդկանց թրաֆիկինգի դեմ պայքարի շրջանակներում Հայաստանը համագործակցում է ԵԽ մարդկանց շահագործման (թրաֆիկինգի) դեմ պայքարի փորձագետների խմբի (ԳՐԵՏԱ) հետ: ԱԳՆ-ն համակարգում է փորձագետների խմբին ներկայացվող ՀՀ ազգային զեկույցների մշակումը և խմբի մոնիտորինգային այցերը Հայաստան: Վերջին այցը տեղի է ունեցել 2021թ. սեպտեմբերին: 2022թ. մայիսին հրապարակվել է  ԳՐԵՏԱ-ի` Հայաստանի վերաբերյալ վերջին՝ 3-րդ գնահատման փուլի զեկույցը (տես՝ https://rm.coe.int/greta-third-evalution-report-on-armenia/1680a6b4ba):

Հայաստանը համագործակցում է ԵԽ Ազգային փոքրամասնությունների պաշտպանության մասին շրջանակային կոնվենցիայի Խորհրդատվական կոմիտեի (ԱՓՇԿ ԽԿ) հետ, վերջինիս ներկայացնում է ՀՀ ազգային զեկույցներ: Զեկույցի նախապատրաստման աշխատանքները, ինչպես նաև Խորհրդատվական կոմիտեի մոնիտորինգային այցերը Հայաստան համակարգում է ՀՀ ԱԳՆ-ն: Վերջին այցը իրականացվել է 2022թ. փետրվարին:  Այցի արդյունքում պատրաստված 5-րդ Կարծիքը հրապարակվել է 2023թ. Փետրվարին (տես՝ https://www.coe.int/en/web/minorities/armenia):

Հայաստանը համագործակցում է ԵԽ Ռասիզմի և անհանդուրժողականության դեմ եվրոպական հանձնաժողովի (ՌԱԵՀ) հետ: Հանձնաժողովին է ներկայացնում ՀՀ զեկույցները, որոնց համակարգումը, ինչպես նաև հանձնաժողովի կողմից իրականացվող մոնիտորինգային այցերը իրականացնում է ՀՀ ԱԳՆ-ն: 2022թ. մայիս-հունիսին կայացել է ՌԱԵՀ-ի վերջին մոնիտորինգային այցը, որի արդյունքում կազմված զեկույցը հրապարակվել է 2023թ. հունիսին (տե՛ս https://rm.coe.int/sixth-report-on-armenia/1680ab9e33):

Հայաստանը համագործակցում է ԵԽ Գենդերային հավասարության հանձնաժողովի (ԳՀՀ) հետ, ներկայացնում է ԵԽ Գենդերային հավասարության ռազմավարական ծրագրերի իրականացման մասին տարեկան զեկույցներ: Վերջին զեկույցը ներկայացվել է 2022թ. (տես՝ https://rm.coe.int/2021-annual-report-on-the-implementation-of-the-gender-equality-strate/1680a710cf)։

Այցեր

Եվրոպայի Խորհուրդ

Հայաստան 

Օգտակար հղումներ.

Եվրոպայի Խորհուրդ` www.coe.int

ԵԽ Խորհրդարանական վեհաժողով` assembly.coe.int

Մարդու իրավունքների եվրոպական դատարան` www.echr.coe.int/echr

ԵԽ-ում ՀՀ մշտական ներկայացուցչություն` www.coe.mfa.am 

Երևանում ԵԽ գրասենյակ ` www.coe.am

Թարմացված է՝ 13.02.2024թ.