Երկկողմ հարաբերություններ
Թուրքիա
Ընդհանուր տեղեկություններ
1991թ. դեկտեմբերի 24-ին Թուրքիան պաշտոնապես ճանաչել է Հայաստանի Հանրապետությունը, սակայն մինչ օրս հրաժարվում է դիվանագիտական հարաբերություններ հաստատել Հայաստանի հետ:
1993 թ. Թուրքիան միակողմանի փակել է օդային եւ ցամաքային սահմանը Հայաստանի հետ: Միջազգային հանրության ճնշման ներքո օդային սահմանը վերաբացվել է 1995-ին: Ցամաքային սահմանի վերաբացմանը եւ դիվանագիտական հարաբերությունների հաստատմանը խոչընդոտում են Թուրքիայի կողմից առաջ քաշված մի շարք նախապայմաններ` մասնավորապես ԼՂ-ի վերահսկողության տակ գտնվող շրջանների վերադարձը Ադրբեջանին և Հայոց ցեղասպանության միջազգային ճանաչումից հրաժարումը: 1991-ից ի վեր հարաբերությունների կարգավորման բազմաթիվ փորձեր են եղել, որոնք անհաջողությամբ են պսակվել Թուրքիայի որդեգրած դիրքորոշման պատճառով:
2008թ. ՀՀ Նախագահի նախաձեռնությամբ սկսվեց հայ-թուրքական հարաբերությունների կարգավորման նոր փուլ, որի արդյունքում 2009թ. հոկտեմբերի 10-ին Ցյուրիխում ՀՀ եւ ԹՀ ԱԳ նախարարները ստորագրեցին «Հայաստանի Հանրապետության եւ Թուրքիայի Հանրապետության միջեւ դիվանագիտական հարաբերություններ հաստատելու մասին» եւ «Հայաստանի Հանրապետության եւ Թուրքիայի Հանրապետության միջեւ հարաբերությունների զարգացման մասին» արձանագրությունները:
Արձանագրությունների ստորագրումից հետո Թուրքիան, կտրուկ փոխելով իր դիրքորոշումը եւ հրաժարվելով «խելամիտ ժամկետներում» եւ առանց նախապայմանների երկկողմ հարաբերությունները կարգավորելու ձեռք բերված համաձայնությունից, Թուրքիայի Ազգային Մեծ Ժողովում Արձանագրությունների վավերացումը պայմանավորեց ԼՂ-ի հիմնահարցի կարգավորմամբ:
2010թ. ապրիլի 22-ին, հաշվի առնելով թուրքական կողմի դիրքորոշմամբ ստեղծված իրավիճակը, ինչպես նաև ՀՀ իշխող կոալիցիոն ուժերի քաղաքական խորհրդի համատեղ դիմումը, Արձանագրությունների վավերացման գործընթացը կասեցվեց` համաձայն ՀՀ նախագահի հրամանագրի: 2015թ. փետրվարի 16-ին ՀՀ Նախագահի հրամանագրով հայ-թուրքական արձանագրությունները հետ են կանչվել Ազգային Ժողովից: 2018թ. մարտի 1-ին ՀՀ Նախագահի հրամանագրով դադարեցվել է հայ-թուրքական արձանագրությունների կնքման ընթացքը:
Այցեր
| 2008թ. սեպտեմբերի 6 | ԹՀ նախագահ Աբդուլահ Գյուլի այց Երեւան` ՀՀ եւ ԹՀ ֆուտբոլի հավաքականների խաղը դիտելու նպատակով |
| 2009թ. հոկտեմբերի 14 | ՀՀ Նախագահ Սերժ Սարգսյանի պատասխան այց Բուրսա` ՀՀ եւ ԹՀ ֆուտբոլի հավաքականների խաղը դիտելու համար |
| 2013թ դեկտեմբերի 12 | Երեւանում կայացած ՍԾՏՀԿ նիստին մասնակցելու նպատակով Երեւան է ժամանել ԹՀ ԱԳ նախարար Ահմեդ Դավութօղլուի գլխավորած պատվիրակությունը |
| 2014թ. օգոստոսի 28 | ՀՀ ԱԳ նախարար Էդվարդ Նալբանդյանն Անկարայում մասնակցել է ԹՀ նորընտիր նախագահ Ռեջեփ Թայիփ Էրդողանի երդմնակալության արարողությանը |
Ստորագրված փաստաթղթեր
Արձանագրություններ
- «Հայաստանի Հանրապետության եւ Թուրքիայի Հանրապետության միջեւ դիվանագիտական հարաբերություններ հաստատելու մասին»
- «Հայաստանի Հանրապետության եւ Թուրքիայի Հանրապետության միջեւ հարաբերությունների զարգացման մասին»
Առևտրատնտեսական կապեր
Ապրանքաշրջանառության ծավալները /հազ. ԱՄՆ դոլար/
| արտահանում | ներմուծում (ըստ ծագման երկրի) | |
|---|---|---|
| 2009թ. | 1197.5 | 177648.8 |
| 2010թ. | 1291.3 | 210381.2 |
| 2011թ. | 1049.4 | 240248.2 |
| 2012թ. | 927.8 | 213468.3 |
| 2013թ. | 1595.6 | 210702.2 |
| 2014թ. | 1494.3 | 232355.4 |
| 2015թ. | 1344.2 | 110728.2 |
| 2016թ. | 504.9 | 163648.2 |
| 2017թ. | 913.3 | 222465.8 |
Ներմուծվող հիմնական ապրանքատեսակներ
Սննդամթերք, հագուստ, տնտեսական ապրանքներ, քիմիական արդյունաբերության ապրանքներ եւ այլն:
Արտահանվող հիմնական ապրանքատեսակներ
Մորթի, ոսկերչական իրեր, զանազան մետաղական արտադրանք եւ այլն:
Թարմացված է 28.01.2019թ.